Tittie Henna vier 102de verjaarsdag
Johanna Carolus, algemeen bekend as Tittie Henna en die oudste inwoner in George, het verlede Donderdag 26 Julie, haar 102de verjaarsdag saam met vriende en familie by haar huis in Blanco gevier.
Carolus het verlede jaar in November by haar splinternuwe huis in Vloedstraat ingetrek nadat die Wes-Kaapse minister van behuising, Bonginkosi Madikizela, sy belofte van 'n nuwe huis aan haar nagekom het. Carolus woon al haar hele lewe in Blanco.
'n Partytjie is deur George-munisipaliteit gereël en sy was die middelpunt van aandag met haar pienk jas en 'n kroon op haar kop.
Familie en vriende het hul stories oor Johanna gedeel met Eva Carolus, haar jongste suster, wat vertel het dat 'n jonger Johanna baie streng was.
"Sy was gefokus op eksie-perfeksie, hardwerkend en het tot 80 jaar oud nog hout uit die bos gedra."
Muriel de Villiers, Johanna en haar seun Ronald (74) se versorger, sê Carolus is al vir 52 jaar in haar sorg. Tydens die partytjie is dit duidelik dat Carolus geheg is aan Muriel. Wanneer Muriel nie in sig is nie, roep Carolus haar.
Muriel sê Carolus is lief vir 'n koppie koffie en vleis. Wanneer daar nie vleis in haar bord is nie vra sy, "Waar is my vleis?" Sy sê Carolus het ’n goeie aptyt. Tydens 'n stil oomblik vra sy kliphard, "Is daar nie 'n stukkie patat nie?"
George-burgemeester, Melvin Naik, en wyksraadslid Jean Syfers, het ook die partytjie bygewoon. Naik het die familie, vriende en organiseerders bedank vir hulle teenwoordigheid.
Sy was gefokus op eksie-perfeksie, hardwerkend en het tot 80 jaar oud nog hout uit die bos gedra.