Perde gevind kort na diefstal
Twee mans (27 en 33) van Golden Valley in Blanco is Dinsdagoggend 31 Augustus deur die George-polisie in hegtenis geneem ná twee perde die vorige dag van 'n kleinhoewe in Maitlandstraat gesteel is. Die diefstal het omstreeks 02:00 Maandagoggend plaasgevind.
Volgens Linda Squair, die eienaar van die perde, het die perde gelukkig geen beserings opgedoen nie en lyk op die oog af ongeskaad.
Hulle is egter twee van haar kwesbaarste perde. "Een van hulle is reeds 20 jaar oud. Die ander een is my dogter se vierjarige perd waarop ek nog nie eers ry nie, want ek is bang ek is te swaar vir haar. Nou het twee volwasse mans die arme ding dwarsdeur die nag gery," sê sy.
Albei was ook in hulle tweede week van perdesiekte-inentings. Gedurende dié tydperk is dit lewensgevaarlik vir perde om enige strawwe oefening te doen.
Squair het Maandagoggend omstreeks 07:30 agtergekom die perde is gesteel. "Al twee was weg uit die trop en die drade was geknip."
Die viervoetiges is later in Blanco, deur Andrea Auerbach, 'n leerlinginspekteur by die DBV, gevind toe sy op pad werk toe was. Sy het die perde en die verdagte ruiters gewaar, maar toe sy stop en hulle konfronteer het hulle van die perde afgespring en weggehardloop. Die twee is later deur die gemeenskap uitgewys en in hegtenis geneem. Hulle sal eersdaags in die Georgelanddroshof verskyn.
Volgens Wendy Jones, 'n woordvoerder van die Tuinroete DBV, is dit die tweede keer in drie weke dat perde in die Blanco-gebied gesteel word. ’n Saak van dieremishandeling is by die polisie aanhangig gemaak en die mans sal eersdaags in die George-landdroshof verskyn.
Jones sê die DBV moet gekontak word indien verdagte gedrag rondom perde of mense wat perde met tuisgemaakte toerusting ry, opgemerk word.
Mense kan verdagte optrede by die DBV in George aanmeld by 044 878 1990/3.