Talle ongelukke in en om George
Brümilda Swartbooi
Verskeie mense is die afgelope naweek in ongelukke op paaie in en om George beseer. Geen sterftes is aangemeld nie. In een van die ongelukke is 'n tiener, wat onderweg was na 'n matriekafskeid, beseer en in 'n ander is die beseerde bestuurder beroof terwyl hy op mediese hulp gewag het.
Ongeluk op lughawepad
'n Rooi Citroën het Vrydagaand, 27 Julie, op sy dak beland na 'n botsing omstreeks 17:58 op die lughawepad, R102. Die ander voertuig, 'n blou Opel, met ses insittendes, het in die rigting na George op die R102 gery en die rooi Citroën, met twee insittendes, het uit die rigting van die lughawe gekom. Die twee voertuie het by die kruising gebots.
Volgens George-polisie se kommunikasiebeampte, sers. Michael Opperman, is twee persone met beserings na die hospitaal geneem. Die ander ses persone het ligte beserings opgedoen.
Volgens inligting was die 17-jarige passasier in die rooi Citroën onderweg na haar matriekafskeid. 'n Saak van roekelose en nalatige bestuur word ondersoek. Ongeluk op die hoek van Courtenay- en Wellingtonstraat.
Ongeluk op die hoek van Wellington en Courtenaystraat
Twee bestuurders is Saterdagaand, 28 Julie, beseer in ‘n botsing tussen ‘n wit Peugeot en ‘n wit Nissan, omstreeks 22:30 op die hoek van Courtenay- en Wellingtonstraat. Die Peugeot en die Nissan het albei in Courtenaystraat gery.
Volgens die polisie het die bestuurder van die Nissan regs in Wellingtonstraat gedraai toe hy met die Peugeot gebots het.
Ongeluk op N2
'n Ongeluk Saterdagmiddag, 28 Julie, op die N2 tussen die Garden Route Mall en Thembalethu-brug het 'n kleinhandelaar sy vrag op sy bakkie gekos. Die bestuurder het vermoedelik beheer oor sy bakkie verloor nadat sy motorband gebars en die voertuig die pad verlaat het. Die man is deur ER24 na George-hospitaal geneem. Die kleinhandelaar se hele vrag is gesteel terwyl hy vir nooddienspersoneel gewag het.
Ongeluk tussen George en Oudtshoorn
In 'n ongeluk Sondagmiddag, 29 Julie, tussen George en Oudtshoorn was die bestuurder van 'n Hyundai-vragmotor in sy sitplek vasgekeer en 'n passasier het buite die voertuig gelê met die aankoms van paramedici op die ongelukstoneel.
Volgens die polisie het die ongeluk omstreeks 14:30 plaasgevind. Die bestuurder het vermoedelik beheer oor die vragmotor verloor.
Die passasier en die bestuurder het ligte beserings opgedoen en is onderskeidelik na die George-hospitaal en Mediclinic George geneem.