Kom vier ’n dekade van Klein Karoo Klassique
Klein Karoo Klassique (9 tot 12 Augustus) vier vanjaar ’n dekade van klassieke musiek, kuns, kos en wyn op Oudtshoorn in die Klein-Karoo. Die musiekprogram word daagliks by Die Windpomp Restaurant afgesluit, met intieme musiekoptredes in verskeie musiekstyle.
Die program in Die Windpomp Restaurant word op Donderdag 9 Augustus om 21:00 deur die viool-duo van Ellani de Jager en Donné de Kock, oftewel The Grey, geopen.
Hierdie dramatiese vioolduo het reeds landwyd kompetisies gewen en in Duitsland, Switserland, Oostenryk en Namibië opgetree.
Hulle musiek word gekenmerk deur ’n vermenging van oud en nuut, met klassieke musiek uit ’n wye reeks genres, waaronder pop, rock en ballades.
Op Vrydag 10 Augustus om 21:00 keer Brathew van Schalkwyk (klavier), Jesse Julies (saksofoon en sang) en Naledi Masilo (sang) terug na Klassique vir Another Evening of Jazz. Feesgangers kan uitsien na ’n splinternuwe jazz-program met ’n vermenging van tradisionele jazz en meer kontemporêre interpretasies.
José Dias (klavier) voltooi die program in Die Windpomp op Saterdag 11 Augustus om 21:00 met een van die belangrikste klavier-meesterstukke,
24 Preludes Op.28, Frédéric Chopin. Die gehoor ervaar ’n stormagtige, romantiese en fantastiese reeks van onvergeetlike musikale sketse.
Kaartjies
“Kaartjies vir die optredes in Die Windpomp Restaurant kos R90 en het verlede jaar blitsvinnig uitverkoop. Feesgangers moet hul kaartjies vroegtydig bespreek, aangesien sitplek beperk is,” sê Hugo Theart, waarnemende uitvoerende hoof van Kunste Onbeperk, aanbieder van Klein Karoo Klassique. Volgens Theart is kaartjies vir hierdie drie optredes slegs by Kunste Onbeperk se kantoor in Die Neelsie (Jan van Riebeeckweg 217, Oudtshoorn) of telefonies by 044 203 8600 beskikbaar.
Aandetes
Theart voeg by dat heerlike aandetes saam met dié vertonings geniet kan word. “Aandete word saans vanaf 19:00 bedien. Kaartjies na die vertonings, sluit nie aandete in nie.
Die volledige spyskaart is by Kunste Onbeperk se kantoor beskikbaar, waar besprekings vir etes ook gedoen kan word.” Theart sê verder hoewel voorafbesprekings vir aandete aanbeveel word, is dit nie noodsaaklik nie. Die optredes is in die Windpomp Restaurant by NG Moederkerk se CJVkompleks hoeke van Kerk-, Hoog- en Adderleystraat Oudtshoorn.