Die bestuur van ons dorp
Tinus Nortje, Afriforum: omgewingsake:
Ons as belastingbetalers sal moet betrokke raak by ons dorpsbestuur deur ons oë en ore oop te hou. Daar word vir jare al gekla in die koerante oor ons bome wat so doodgaan. Kommentaar is gelewer sonder om te kyk wat die oorsaak is. Nou het elke dooie boom 'n bord op vir waarskuwing.
Ons sal ook betrokke moet raak by die besmette riviere wat ons dorpsdam voed.
Met die jongste watermonster is die E. coli besmetting se telling 28 000.
Ons kinders speel in die rivier en dam en dis ook 'n visvangplek.
As iemand met daardie water in aanraking kom met 'n wond, kan dit ernstige gevolge hê.
Onthou wat het in die besmette Kaaimansrivier gebeur 'n paar jaar gelede.
Op Saterdag 21 Julie om 12:00 is die rioolpompstasie by Dikkoplaan weer oopgedraai in die dam in. Die rioolpype langs die Mitchellrivier oorstroom gereeld by die mangate of die pyp bars en loop in die rivier terug in die dam in. Ons weet dat die water skoongemaak word, maar die besoedeling voor die skoonmaakproses is lewensgevaarlik vir die publiek. Die kariba weed is reeds in ons dorpsdam en dit is ook al in die meregebied opgemerk.
Die plante groei net in rioolbesmette gebiede. Die riviere is toegegroei en belemmer die watervloei na die dam.
Ons as belastingbetalers kan gerus gaan kyk hoe lyk die rivier en die oewer van die rivier by 11de Laan in Denneoord asook die rivier by Dikkoplaan, en om te dink dis ons drinkwater. By die pompstasie, waar die water skoongemaak word, spoel die vuil besmette water weer terug in die rivier en eindig weer in die dorpsdam.
Wonder of dit wettig is en of word dit net in George gedoen. Indien daar nie verbeterings kom nie, sal ons belastingbetalers die belasting wat gehef word op riolering en water terughou in 'n trustrekening om daardie fondse te gebruik vir die opgradering van die rioolstelsel en ander gesondheidsgevare.
Iewers moet opgetree word, kom ondersteun ons. Daar is reeds 'n komitee gestig deur ‘Vriende van die riviere’. Kom ondersteun ons daar.