Elma en Jovan stap weg met topsportpryse
Die gholfspeler Jovan Rebula en die Protearolbalspeler Elma Davis, is Vrydagaand op Oudtshoorn by die Eden-sportraad se jaarlikse sporttoekennings onderskeidelik as sportman en sportvrou van die jaar gekroon.
Albei Georgiete het vanjaar op die internasionale sportverhoog geskitter en dié toekennings onteenseglik verdien en voorts bewys dat die dorp die titel as Suid-Kaap se sportmekka waardig is.
Meer as 190 nominasies, waaronder verskeie sportsterre met Protea-kleure, is vir die 33 kategorieë ontvang.
Atletiek SWD, onder die voorsitterskap van Shireen Noble, is aangewys as die topfederasie in die Eden-distrik. Dis geen geringe prestasie nie as mens in ag neem dat hulle teen 50 ander geaffilieerde federasies moes meeding.
Die Presidents-toekenning het aan die deurwinterde sportadministrateur, Dave van der Walt, gegaan.
Ander toekennings het is gemaak aan Trevor Davis van Eden-rolbal (administrateur van die jaar), Suid-Kaap mid-amateur interprovinsiale gholfspan (beste sportspan), Antonio Farmer (beste skoolsportman), Meike Strydom (beste junior sportvrou), Jean du Plessis (beste junior sportman), Joe Arendse van Atletiek SWD (lewenslange bydrae), Christo Vermaak (joernalis van die jaar) en Deidre Cloete (fotograaf van die jaar).
Die Wes-Kaapse departement van kultuursake en sport en die groter Oudtshoorn-munisipaliteit het die aand in samewerking met die Eden-sportraad aangebied.
Sekondêre borge soos Group Editors, EDENfm, Leading Edge, Oudtshoorn Inn en Liquorland het ook tot die aand bygedra.