Outeniqua-onnies skitter op verhoog
Pauline Lourens
Die dak het behoorlik Dinsdagaand gelig terwyl onderwysers van Hoërskool Outeniqua luid toegejuig is met dawerende applous om hulle talente as sangers, musikante en dansers vir die eerste keer in baie jare te onthul in ‘n ware skouspel van lig, vuurwerke en lasers.
Voor 'n stampvol saal het items vir die vertoning gewissel van sang- en instrumentale ensembles, kore, danse en skreeusnaakse 'lipsync'.
"Die doel van Starry Starry Night was om ouers en leerders te vermaak en om die personeel soos ‘n ware bron van lig te laat skitter." So vertel Elna Pretorius die ontwerponderwyser wat die regisseur was.
En dit het die leerkragte inderdaad met oorgawe gedoen met blink uitrustings, grimering en professionele optredes onder leiding van drama- en musiekkundiges Karleine Herbst en Lynette Petersen.
Telkens het die onnies gesorg vir uitstekende optredes met 'n geoefende orkes en aangesien Outeniqua beskik oor 'n dansskool was dit ook so dat die prinsipaal van die dansskool, Wehan van Jaarsveld en Elissa Kaplan met grasieuse en sensuele choreografie te voorskyn gekom het.
In 'n prettige swembadtoneel het onnies verskyn in baaipakke vir 'n gesinkroniseerde 'swemdans' en gewis hul gemaksone verlaat en dit het bygedra tot 'n ware topaand van vermaak.