Landbouskou

PROPVOL VERMAAK

Die George-landbouskou is vanjaar 158 jaar oud en groei van krag tot krag onder die aanvoering van die Outeniquaskougenootskap wat 'n paar jaar gelede begin het om hernieude fokus op landbou te plaas.

Dit het gelei tot verskeie prestigelandbougeleenthede wat op die jaarlikse program geplaas is. Vanjaar is nog so 'n geleentheid toegevoeg met die SuidAfrikaanse Jersey-kampioenskappe wat op die skouterrein gehou word. Die plaaslike organiseerders met Nico van Rensburg aan die stuur het baie moeite gedoen en 'n spogvenue op die skouterrein opgerig vir dié geleentheid. Die kampioenskap is Dinsdagaand deur George-burgemeester, Melvin Naik geopen.

Die skougenootskap het ook samewerking met die Wes-Kaapse landboudepartement bewerkstellig wat gelei het tot die aanbied van 'n waardevolle program vir opkomende boere elke jaar. Boere van oor die Wes-Kaap trek ook by die skou saam vir die WesKaapse Simmentaler-kampioenskappe.

Benewens die verskeie diereafdelings waar boere hul beste voetjie voorsit, is die skouterrein propvol uitstallings, kosstalletjies, kompetisies en 'n heerlike vermaakprogram vir die hele gesin. Kunstenaars wat die vermaaktent aan die brand gaan sing, is Kurt Darren, die Campbell-broers,

Rooies, Piet Pompies, Michael Lindt, Desmond Wells en Donkiekar-boereorkes. Donderdagaand is Moses Williams en sy groep met hul vertoning, Lag in Afrikaans, op die verhoog om die lagspiere te prikkel.

Die Graskoue Trappers, bekende rieldansers van Wuppertal, is weer hier en gaan dans dat die stof staan.

'n Opwindende nuutjie by die skou is 'n skattejagkompetisie in samewerking met Georgiete Staan Saam. Sentrale punte op die skouterrein gaan gemerk word en enige persoon kan deelneem aan die jag deur 'n selfoontoep af te laai. Besoek die stalletjie van Georgiete Staan Saam waar hulle jou sal help om in te skryf. Daar is baie groot pryse om te wen.

Die toegangsfooie vandag, Donderdag 30 Augustus, is R50 vir volwassenes en R20 vir kinders, en vir Vrydag en Saterdag is dit R60 en R20.

Foto: Manie van der Hoven Die 11-jarige Jaco van Deventer van Doornvlei Jerseys se koei Doornvlei Iatola Starter is Dinsdagaand aangewys as die Kampioen Goue Koei tydens die opening van die Suid-Afrikaanse Jerseykampioenskap by die George-skouterrein. Dit is die eerste keer dat die kampioenskap by die George-landbouskou aangebied word. Jaco se pa, Pieter van Deventer se koei, Doornvlei T-bone is aangewys as die Reserwe Kampioen. Iatola Starter en T-Bone Starter is ma en dogter! Dinsdagaand was net ‘n voorsmakie van die vol landbouprogram wat vanjaar opgedis word by die 158ste skou van die Outeniqua-skougenootskap. Daar is heerlike vermaak vir die hele gesin met kompetisies, stalletjies, kos, ‘n verskeidenheid interessante uitstallings en ‘n paar uitspanplekke waar skougangers hulle voete kan rus en kele kan lawe terwyl daar lekker gekuier word. Die skou duur tot Saterdagaand 1 September.

Foto: Alida de Beer Die nasionale Jersey Jug-kampioen is Mella van Nico van Rensburg (tweede van links) van Avondrood Jerseys in George. By hom is, van links: die George-landbouskou se president Gert Pretorius, George-burgemeester Melvin Naik, en die George-speaker, Gerrit Pretorius.