DBV waarsku na hond vrou in Pacs aanval
Die hond wat Leonie Ruiters (55) bykans ‘n maand gelede in Pacaltsdorp aangeval het, is volgens die Tuinroetedierebeskermingsvereniging (DBV) van kant gemaak.
Senior inspekteur van die
DBV, Salomé Bruyns sê die
DBV is bekommerd oor die aantal voorvalle wat onlangs aan die DBV en Wetstoepassing gerapporteer is van honde wat mense aanval.
“Die betrokke hond in Leonie se geval is verlede week van kant gemaak. Die eienaar het die hond vrywillig oorgeteken aan die DBV. Die besluit om die dier van kant te maak is gemaak op grond daarvan, dat die hond ‘n gevaar ingehou het vir die publiek en ‘n hoë risiko hond was om uit te plaas. Leonie se wonde was ernstige byt- en skeurwonde. Leonie is al vir meer as ‘n maand in die hospitaal,” verduidelik Bruyns.
Die voorval het naby Ruiters se suster se huis in Cycadstraat plaasgevind. “Nadat ek my suster se erf verlaat het, het ek iets agter my gehoor. Dis toe die hond my bespring,” het Ruiters in ‘n vorige onderhoud aan die George Herald vertel.
“Om eienaars op te voed oor die korrekte aanhou van honde - kan in gevalle waar honde mense en selfs ander honde aanval voorkom word,” sê Bruyns.
“Wetstoepassing gesamentlik met die opvoedkundige eenheid van die DBV beoog om so gou as moontlik met opvoedkundige veldtogte te begin om die publiek bewus te maak van die gevaar wat die diere moontlik kan inhou indien hulle nie reg grootgemaak word nie. Enige honde wat nie reg aangehou word nie, byvoorbeeld in hokke of aan ’n ketting word aggressief, ongeag wat die ras van die honde is.”
Volgens munisipale verordening vir die regulering van die aanhou van honde, mag geen persoon enige hond, wat aan hom of haar behoort of aangehou word toelaat:
Om volgens sy of haar kennis waarskynlik ‘n bron van gevaar vir ‘n besering aan enige person, buite die perseel waarop so ‘n hond aangehou word, veroorsaak,
Om in ‘n publieke straat of ‘n publieke plek te wees, tensy aan ‘n leiband en onder die kontrole.
Om ‘n kwaai hond op die eiendom te hou sonder ‘n kennisgewing bord buite die eiendom wat moontlike gevaar aandui.
Om enige wilde of gevaarlike hond in enige publieke straat of publieke plek toe te laat sonder ‘n bevoegde volwasse se leiding.