Parke se dinge is ‘deur die blare’
Probleme met die organogram, drywers of lae posvlakke en 'n tekort aan opleiding vir toesighouers is van die kwessies wat amptenare en werkers van die munisipale afdeling parke en tuine bekommer.
Volgens Sam Ncamile, 'n drywer van dié afdeling en 'n verteenwoordiger van die vakbond Samwu (South African Municipal Workers Union), is dinge "baie deurmekaar" in hulle afdeling.
Ncamile beweer drywers van ander munisipale direktorate is almal op 'n T8-posvlak, terwyl die wat vir parke en tuine werk voortswoeg op 'n T5-posvlak. 'n Ander amptenaar van die afdeling, Adam Mostert, is weer aangestel as 'n senior toesighouer vir die George-begraafplaas, maar hy het glo nog nie in die afgelope vyf jaar 'n voet daar gesit nie. "Ek werk as toesighouer in die westelike deel van George," het hy gesê. "My kollega, wat al die jare in die afdeling werk, werk nou as toesighouer by die begraafplaas. Hy het onlangs 'n dispuut in die verband gewen en is nou sodanig aangestel. My pos, die een van senior toesighouer, is onlangs vir die derde keer geadverteer. Hoe werk dit?" het hy gevra.
Mostert en Valdon Muller, ook 'n toesighouer van die afdeling, is dit eens dat hulle nie genoeg opleiding ontvang het om hul werk deeglik te doen nie. 'n Vergadering met senior amptenare wat twee weke gelede sou plaasvind is vir die soveelste keer uitgestel en daarom was die drie manne moedeloos verby. "Ons het uiteindelik verlede week 'n kans gehad om die dinge om 'n tafel te bespreek; ons sal maar moet sien of ons pleidooi gehoor word," het Muller gesê.
Munisipale woordvoerder, Chantel Edwards-Klose, het by navraag geantwoord dat die munisipaliteit nie op interne personeelkwessies kommentaar lewer nie.