Prestige Bonsmaraveiling 8 September
Die 8ste Prestige veiling van die SuidKaap Bonsmaraklub word op 8 September by GWK se veilingskrale by Herold aangebied.
Daar sal 20 stoetbulle wees, asook 60 kommersiële vroulike diere, waarvan die meeste dragtige verse is.
Die stoetbulle word aangebied deur Mikie du Toit van Swartshoek Bonsmaras by Humansdorp, Ockie Potgieter van Letterkrans Bonsmarastoet van Kruisrivier naby Calitzdorp, Lourens Eales van Ruiterbos Bonsmaras, Mosselbaai en
Eugene Louw van Jubilee Bonsmaras van Swellendam.
“Koop liewer ‘n goedkoper bakkie as wat jy op jou bul bespaar,” haal Eales dr. Matthys Strydom aan. “Die bul dra 50% by tot elke kalf wat aankom en sy bydrae tot jou kudde sal vir omtrent 10 jaar sigbaar, en voelbaar aan jou sak wees - hetsy goed of sleg.”
Eales meen met die ontwikkeling van die Bonsmararas het kundiges al die proefnemings met kruisteling - kostes en verliese ingesluit - reeds vir jou gedoen, wat duur eksperimente met mode-rasse onnodig maak. “Ek het nog nooit spyt gekry oor my keuse van dié ras nie. Ons boer nie in ‘n goeie vleisbees-omgewing nie, maar die Bonsmara het sy waarde hier ongetwyfeld genoegsaam bewys.” Hy raai voornemende kopers aan om seker te maak die Bonsmarabul is met die kenmerkende B-merk op sy regterskouer gemerk.
“Daar is topbulle om van te kies en te keur - daar is bulle wat speenkalf produsente is, bulle om meer vrugbaarheid of melk in jou kudde te bring, of meer bespiering of lengte, of bulle om verse mee oop te maak .”
Besigtiging begin Vrydag 7 September om 14:00. Die veiling begin Saterdagoggend om 11:00. Vir meer inligting, kontak Ockie Potgieter by 082 776 3730, Mike du Toit by 083 602 7935, Eugene Louw by 082 573 9548 of Lourens Eales by 082 904 4588.