Divann kry sy eie rekenaar
'n Droom het waar geword vir Divann Goliath (12), 'n outistiese leerder by Carpe Diem-skool en dalk beter bekend as GO GEORGE se mees lojale ondersteuner.
'n Artikel oor Divann se mees onlangse besoek aan die GO GEORGE-kantoor het 'n paar weke gelede in die media verskyn, met 'n foto van hom by 'n lessenaar met, in sy eie woorde, 'n "báie groot rekenaar" wat hom mateloos beïndruk het. Op 'n olieboor in Kurdistan, blaai George-inwoner Charles van Niekerk, deur Facebook en kom af op die artikel en foto's van die mannetjie met die groot glimlag. Charles was onmiddellik aangeraak deur die seun se entoesiasme en opgewondenheid en laat toe ’n kommentaar dat hy baie graag vir Divann 'n goeie tweedehandse rekenaar wil koop. GO GEORGE het gevolglik kontak gemaak met Charles en na 'n paar dae van beraadslaging met 'n plaaslike rekenaaronderneming kom daar 'n WhatsApp-boodskap deur vanaf Kurdistan: EFT vir Divann se laptop is gedoen – sluit ontwerp-program en geheuestokkie in. Gereed vir oplaai. Dirk Conradie die rekenaardeskundige, wat die mooi skootrekenaar wat net vir demonstrasies gebruik is opgespoor het, het aangebied om kosteloos vir Divann lesse te gee op die nuwe tekenprogram. Tydens die oorhandiging was dit egter gou duidelik dat die jongman geen bekendstelling aan rekenaars nodig het nie. Met 'n kliek of drie, en ten spyte van die onbekende Windows 10 op Divann Goliath se eerste eie rekenaar, het Microsoft Paint op die skerm oopgemaak gereed vir Divann om te gebruik. Divann hard aan die werk in sy kantoor, GO GEORGE-tydroosters teen die muur vir vinnig loer. Sy pa, David, het spesiaal ’n tafel in sy kamer ingedra vir ’n permanente werksplek noudat Divann sy eie rekenaar het.