Langeberg Sages besoek Suid-Kaap
Heidelberg se gholfbaan was op Dinsdag 21 Augustus letterlik 'n miernes van bedrywigheid toe 68 gholfspelers daarop toegesak het.
Die rede vir die groot getal was die jaarlikse botsing tussen die Langeberg
Sages en Suid-Kaap se spelers, 'n lekker kompetisiedag wat nou reeds tradisioneel deur Sentraal-Suid Koöperasie (SSK) geborg word.
Die byeenkoms wissel elke jaar tussen Swellendam en Heidelberg en hierdie jaar was dit dan die Suid-Kaap wat gasheer gespeel het vir die lekker groot groep spelers.
Neels Lourens, die Sages-verteenwoordiger op Heidelberg verdien ook 'n ekstra klop op die skouer vir al sy harde werk asook die gholfbestuur en baanpersoneel.
SSK skenk nou reeds die afgelope vier jaar 'n ruim bedrag vir die kompetisiedag tussen Suid-Kaap en Langeberg en Kobus van Loggerenberg het die prysuitdeling namens die borge bygewoon.
Die formaat van spel was 'n Beterbal Stableford-kompetisie en die wenners tussen die twee unies is bepaal volgens die gemiddelde Stableford-punte van elke unie se totale pare.
Suid-Kaap het 46 spelers (23 pare) in die
veld gehad en Langeberg 22 spelers (11 pare). Langeberg klop Suid-Kaap
oortuigend met 'n gemiddeld van 44 teenoor 40,3. Brian Oosthuizen en sy spelers is opreg trots hierop.
In die Beterbal-kompetisie het twee pare met hul spel bo die ander spelers uitgetroon. Johan Barnard van Riviersonderend en Lampies Lambrecht van Worcester teken 'n fenomenale 54 punte aan, gevolg deur Leon van Schalkwyk van Boggomsbaai en Dave Gravett van Stilbaai se ewe goeie 52.
Barnard (12 voorgee) het 'n brutotelling van 75 oor die 18 putjies aangeteken en sy maat, Lamprech (20 voorgee) 'n ewe goeie 86. Anton Swart, eienaar van JC Slagtery op Riversdal, het ook soos gewoonlik die dag bygewoon.
Hy borg tradisioneel die naaste aan die penne kompetisie en het ook 'n groot geskenkpak opgemaak wat uitgeloot is om ekstra fondse vir die kankerinsameling te doen.
Suid-Kaap Sages se volgende kompetisie is die Sanlam Kankerdag op Mosselbaai op 10 September.
Uitslag van die kompetisie
1 Johan Barnard en Lampies Lambrecht (L) 54; 2 Leon van Schalkwyk en Dave Gravett (SK) 52; 3 Johan Steyn en Bill Skinner (L) 48; 4 Van le Roux en Pieter le
Roux (SK) 47; 5 Gielie Meyer en David Francke (L) 47; 6 Wouter Human en Nico van Schalkwyk (L) 46; 7 Dawid Gerber en Chris Barnard (SK) 46; 8 Bill en Celia Hart (SK) 45; 9 Chris Coert en Brian Oosthuizen
(L) 45; 10 Gary Ristow en Pat Tavener (SK) 45.
Naaste aan die penne is gewen deur Charl du Randt (SK) op 4/13 en Karl Lewis (SK) op 7/16.