2 vas na motordiefstal by lughawe parkering
Flink optrede deur George se manne in blou het verlede Vrydag verseker dat 'n gesteelde motor binne 12 uur aan die eienaar terugbesorg is.
Die poublou Toyota Conquest met 'n vuurwarm enjin, is Donderdagaand 18 Oktober vanuit 'n huurmotormaatskappy se parkeerterrein by die Georgelughawe gesteel.
Op kringtelevisie kan gesien word hoe 'n voertuig omstreeks 23:45 by die lughawe se valhek ingaan.
Die motor ry dan reguit na die toneel waar een persoon uitklim. Die verdagte haas direk na die Conquest, breek by die motor in en die twee voertuie ry buffer teen buffer by die lughawe uit.
Volgens die Suid-Kaapse polisiewoordvoerder, kapt. Malcolm Pojie, is 'n 22-jarige verdagte van Thembalethu die volgende dag omstreeks 11:00 met die motor in sy besit, in die Kaaimanspas vasgetrek. 'n Seun (11) was ook in die motor.
Die voertuig het na bewering 'n paar ritte tussen Knysna en George aangepak voor die verdagte in sy spore gestuit is.
Die George Herald het ook betroubaar verneem dat die valhek by die betrokke maatskappy se parkeerterrein op die aand van die voorval buite werking was.
"Die verdagte staan tereg op aanklagte van voertuigdiefstal asook van roekelose en nalatige bestuur.
Die moontlikheid dat hy met ‘n ander misdaad verbind word, word ook ondersoek. Forensiese deskundiges moet egter eers die motor vir leidrade en bewyse deursoek," het Pojie gesê.
Nog 'n verdagte gevang
Die polisie het op wiele en motorbande beslag gelê wat moontlik met ander soortgelyke voorvalle verbind kan word.
Na aanleiding van ondervraging en opvolgwerk is nóg 'n verdagte wat met die diefstal van die motor verbind word, in Zone 9 in Thembalethu in hegtenis geneem.
"Die polisie het op wiele en motorbande beslag gelê wat moontlik met ander soortgelyke voorvalle verbind kan word. Albei verdagtes is in aanhouding en sal eersdaags vir 'n moontlike borgtogaansoek in die George-landdroshof verskyn," sê Pojie.
Die Conquest is die tweede gesteelde voertuig wat sedert Donderdag deur lede van die Outeniqua K9-honde-eenheid opgespoor is. Volgens Pojie het dié eenheid op 19 Oktober ook 'n verdagte vir die besit van en handeldryf in tik in hegtenis geneem.
Die verdagte is in die Outeniquapas met
20 g tik met 'n straatwaarde van R5 000 betrap.
Navraag aan George-lughawe
By navraag het Acsa (Airports Company South Africa) se senior bestuurder vir streeklughawens, Senzeni Ndebele, gesê die voorval word tans ondersoek.
"Die voorval word nog ondersoek en ons sal eersdaags volledige kommentaar daaroor lewer," het sy gesê.
Hou ons webtuiste www.georgeherald.com dop vir meer hieroor.