Veerpyltjies vlieg vir kanker
Twee van die George-veerpyltjieklub (GDA) se lede, Mary-Ann Oosthuizen en Mari Pitzer het twee sake wat hulle na aan die hart lê die afgelope naweek saamgegooi in ‘n opwindende eerste vir ‘n hele paar mense: kanker en veerpyltjies. Hulle het die heel eerste Darts Cuppa in George aangebied.
Die program is afgeskop met ‘n gesellige oggendtee in die klub se saal wat pragtig in pienk getooi was.
Chrisley Botha van PSG Wealth het die vroue toegespreek oor die plek van vroue in vandag se finansiële wêreld en sy het haar gehoor met ‘n hele paar interessante feite agtergelaat.
Amelia Thiart van Kansa het meer vertel van die ondersteuningsrol wat die organisasie speel. Daar was ongelooflike pryse en ‘n miniveerpyltjiekompetisie tussen die vroue om te sien wie die hoogste telling met slegs drie pyle kon gooi. Andrea Kritzinger was die wenner met ‘n totaal van 68 en Amelia Thiart het ‘n hele 41 gegooi vir ‘n tweede plek.
Die vroue het heerlik saamgekuier oor smaaklike eet- en drinkgoed en selfs die kleingoed wat saam met hul ma’s daar was, is met ‘n geskenkie bederf.
Die tweede sessie van die dag was die ‘Darts for Cansa’ wat die vorm van spanspel aangeneem het.
Elke span van vier moes een vrouespeler hê. Nadat Amelia Thiart ‘n tjek ontvang het van R1 800 namens die GDA, het sy die kompetisie begin met die eerste gooi.
Daar was ook ‘n prys vir die span wat die beste in pienk aangetrek was. Daar was geen tekort aan spangees en samewerking in enige span nie. Die wenners van die eerste GDA Darts for Cansa 2018 was ‘Pienkies’ met spanlede Bernard Maree, Jaco Pienaar, Len McLean en Mari Pitzer. Tweede was ‘Pienk Rotties’ oftewel die Stevens-gesin Johan, Jaco, Robert en Mona.
Die wenners van die besgeklede span in pienk was ‘Pienk Ribbon Mafia’ met spanlede Billy Smith, Johan van Vuuren, Mary-Ann Oosthuizen en Zander Faddel.
“Die sukses van hierdie dag kan uit en uit toegeskryf word aan al die fantastiese borge en aan elkeen wat deel was van die naweek, van die dames wat die Darts Cuppa-kaartjies gekoop het tot die spanne wat ingeskryf het vir die veerpyltjiekompetisie.
“Die hoogtepunt was om vir Kansa ‘n bedrag te kon oorhandig wat hulle kan aanwend in die stryd teen kanker,” het Oosthuizen gesê.