Op ons paaie die week
George het dié week weer sy deel van motorongelukke ervaar. ‘n Man is verlede Vrydagoggend op die N2 doodgery, vier mense was vandeesweek in ongelukke op die Outeniquapas betrokke, ‘n taxi het na bewering in ‘n motor by die verkeersirkel in CJ Langenhovenstraat vasgejaag (lees artikel hiernaas) en nog ’n ongeluk het plaasgevind by die verkeerslig by die GR Mall.
Man doodgery op N2
‘n Fratsongeluk op die N2 het verlede Vrydagoggend, 2 November, die lewe van ‘n man van Hartenbos geëis. Schalk Janse van Rensburg (58), was van Mosselbaai na George onderweg, toe hy op die snelweg in die noodbaan tussen die Pacaltsdorp-brug en die lughawe stilgehou het.
Volgens die Suid-Kaapse polisiewoordvoerder, kapt. Malcolm Pojie, wil dit voorkom of die oorledene uit sy vragmotor geklim het waarna ‘n wit Toyota Yaris, wat in dieselfde rigting onderweg was, hom getref het. Die bestuurder van die Yaris is ‘n 35-jarige man van George.
Janse van Rensburg is op die toneel dood verklaar. ‘n Saak van strafbare manslag word ondersoek.
Nat Outeniquapas briek motoriste
Vir baie George-inwoners was Maandag en Dinsdag se reën ‘n welkome gesig na die brande, maar vir sommige motoriste op die Outeniquapas, was dit maar ‘n glibberige storie.
Maandagmiddag het die bestuurder van ‘n wit VW Polo, wat vanaf Oudtshoorn na George onderweg was, op ‘n toegelate plek, ‘n vragmotor verbygesteek waarna hy beheer oor die voertuig verloor het. Die Polo het in die aankomende baan beland en ‘n Opel Corsa-bakkie getref.
Drie mense is lig beseer en is per ambulans na die Mediclinic George geneem.
Eden911 het een pasiënt vervoer en ER24- paramedici die ander twee. Dinsdag, ook tydens ‘n reënbui, het die bestuurder (49) van ‘n Toyota Fortuner, onderweg vanaf Oudtshoorn na George, op ‘n draai beheer oor sy voertuig verloor. Die voertuig het op sy dak te lande gekom. Niemand is beseer nie.
Garden Route Mall
Volgens George-polisie se kommunikasiebeampte, sers. Michael Opperman, was twee Nissan-bakkies, ‘n Navara en ‘n NP300, Dinsdagmiddag in spitstyd by die verkeerslig by die Garden Route Mall in ’n botsing betrokke.
“Die bestuurder van die Navara, ‘n 80-jarige man, was onderweg vanaf Knysna na George. Volgens hom was die lig groen.
Hy wou regs draai na Kraaibosch
Manor toe die ander bakkie, wat in die teenoorgestelde rigting gery het, hom tref,” sê Opperman.
Met die polisie se aankoms was die ander bestuurder, glo ‘n vrou, reeds deur ER24paramedici na die hospitaal vervoer.