Gemeenskap help brandslagoffers
‘n Groep van sowat 100 mense wat dakloos gelaat is deur die brande in SANParkgebiede, sal vir die res van die maand versorg word met die milde bydrae van inwoners van Wilderness.
“Ons is baie dankbaar vir almal wat met ‘n oop hand en hart geld geskenk het sodat ons kan kos koop vir tussen 80 en 100 mense, baie van hulle kinders, tot die einde van November,” het Donald Goldfain, direkteur van gemeenskapsdiens van die George Rotariërs en voorsitter van die Wilderness Belastingbetalers en Inwoners Vereniging (WRRA), Vrydag gesê.
Goldfain het verskillende WhatsApp-groepe in die groter Wilderness-gebied, wat Hoekwil en Rondevlei insluit, Maandag genader vir hulp.
“Inwoners het ingespring en gekookte eiers en toebroodjies gemaak, maar die mense kan nie aan die lewe gehou word met net eiers en toebroodjies nie, en Dinsdag het ek gevra dat mense eerder geld skenk.”
Volgens Goldfain het Marius van der Colff van George Super Kitchens in samewerking met die Rotariërs ongeveer 400 gebalanseerde, voedsame warm maaltye aan die haweloses verskaf. Maaltye is ook deur George Super Kitchens aan Hope Church verskaf vir studente van Nelson Mandela Universiteit, wat hul Saasveldkampus moes ontruim weens die brande en by Hope Church in George gehuisves is.
Teen Vrydag was daar reeds ‘n groot som geld ingesamel waarmee ‘n span Rotariërs niebederfbare voedselvoorrade, groente en vrugte gekoop en in gesinspakke opgemaak het.
“Dit sal genoeg wees vir die volgende twee weke,” het Goldfain gesê.
Die mense, wat in Farleigh en Beervlei in SANParke gewoon het, het al hul besittings verloor toe hul huise deur die vlamme verswelg is.
Die haweloses is aanvanklik by SANParke se Ebb en Flow-kamp in die Tuinroete Nasionale Park gehuisves.
Die kospakkies is volgens elke gesin se behoefte aan hulle uitgedeel toe hulle oor die naweek met die hulp van SANParke se ereveldwagters na Pine Lake Marina verskuif is.
“Teen die middel van November sal nog voorrade aangekoop en uitgedeel word,” het Goldfain gesê.
Enigiemand wat ‘n donasie wil maak, kan WRRA of George Rotariërs deur Donald Goldfain kontak by 083 251 401 of goldfain@iafrica.com.