Lees jou kind slim
Die ATKV-tak Sommer Net Ons, in samewerking met Vriende van
Afrikaans, ‘n afdeling van die ATKV, het Saterdag 3 November by Eagles Nest in Pacaltsdorp ‘n voorleeswerksessie vir ouers, onderwysers, fasiliteerders en afgetrede onderwysers aangebied om die waarde van voorlees tuis te bring. Tydens die werksessie was ‘n demonstrasie van hul leesondersteuningsprojek, die Doen en Leerleesprogram, gegee.
Die ondersteuningsprogram is suksesvol getoets by kinders met lees uitdagings/ agterstande asook kinders wat leer lees by verskeie skole in Wes-Kaap.
“Deur ondervinding is geleer dat kinders met agterstande gewoonlik gedragsprobleme ervaar en ‘n lae selfbeeld het. Die program het bewys dat kinders se selfbeeld doeltreffend verbeter word deur die Doen en Leer-program,” sê Beverley Mckelly, voorsitter van die ATKV-tak.
Die doel van die werksessie was om belangstelling by ouers te prikkel om volgende jaar ‘n kursus, om kinders met leesen leerprobleme te ondersteun en effektief voor te berei vir ‘n blinker toekoms, by te woon. Dié kursus sal in Maart deur Vriende van Afrikaans aangebied word.
“Dit is ons verantwoordelikheid om ons kinders te leer lees. Kinders wat kan lees het ‘n blinker toekoms wat op hulle wag,” het Mckelly Saterdag gesê.
Vir meer inligting stuur ‘n e-pos aan beverleymckelly@yahoo.com of kontak haar by 071 604 2007.