Die brande - ‘n warmte om die hart?
Elbie Schoeman, George:
Ek was deel van die SANParke ereveldwagterspan wat die Wilderness-streek van die Tuinroete Nasionale Park bygestaan het tot en met gistermiddag (Maandag 5 November) laat.
Die brande wat om ons dorp gewoed het en sy verwoestende tog nog steeds in die omgewing voortsit, is verskriklik. Ons berg, ons mense, ons diere en ons plante is swaar verwond.
Tog neem ons weer en weer waar hoe medemenslikheid die gemoed verlig en swaarkry makliker maak. Die Tuinroete Nasionale Park is diep getref deur die brand. Daar was lewensverlies, woude het verbrand, behuising is verwoes, fabrieke is daarmee heen. Aan werknemergesinne wat huis en haard verloor het, of wie se eiendom so beskadig is dat hulle dit vir eers moes verlaat, is voorlopig in die Ebb & Flow-ruskamp behuising verskaf en hulle is ook van lewensmiddele voorsien. Die SANParke-ereveldwagters het in hierdie tyd die personeel van die Wilderness-streek bygestaan met die administrasie en verspreiding van die massas donasies wat deur persone met meelewing en instansies geskenk is. Die welwillendheid van mense was ‘n totale riem onder die hart. Daar is ook afgelewer: ‘n Kartondoos met lekkertjies in sakkies verpak en met fraai strikkies vasgebind, pakkies vir die gesinne en kinders. Daarby saam twee kaartjies met boodskappies uit die hart uit. Die kinders van Grant Grootboom, gasvryheidsbestuurder van die Wilderness-streek van die Tuinroete Nasionale Park, Abigail en Ethan, was die skenkertjies wat die maatjies net ‘n bietjie beter wou laat voel. Oud en jonk, die brande het almal diep geraak ...