16 dae van aktivisme begin in George
Inwoners van George en amptenare van die George-munisipaliteit het Maandag 26 November die begin van 16 dae van aktivisme vir geen geweld teen vroue en kinders gevier.
Raadslede, verteenwoordigers van George-munisipaliteit se gemeenskapsontwikkelingsafdeling, plaaslike verkeer, lede van die Thutuzela-sorgsentrum, plaaslike polisielede, lede van die ACVV, Phambili-skuiling vir mishandelde vroue en kinders, die departement van gesondheid, slagoffers en gerehabiliteerde misdadigers, het aan 'n vreedsame optog in Yorkstraat deelgeneem.
Na afloop van die optog is 'n program by die George-museum aangebied waar onderburgemeester van George, Charlotte Clarke, tydens haar toespraak 'n beroep op die gemeenskap gedoen het om aktief deel te neem aan die stryd om geweld teen vroue en kinders uit te roei. "Dit is tyd dat ons mans die voortou neem en die mondstukke, die voorstanders en kampioene van hierdie veldtog word om enige vorm van geweld uit te roei. Ek wil ouers vra om rolmodelle vir hul kinders te wees en die gedragspatrone wat ons van hulle verwag, uit te beeld."
Frendeline Stellenberg, wie se man iemand gehuur het om haar dood te maak, het as 'n slagoffer van mishandeling gepraat.
Sy het 23 meswonde aan haar lyf tydens die aanval opgedoen. Haar boodskap aan slagoffers van mishandeling was om op te staan en te praat.
Raadslid Sean Snyman het tydens sy toespraak benadruk dat enige vorm van mishandeling summier gestop moet word. "Dit is tyd om die kettings van slawerny te breek en op te staan. Genoeg is genoeg.
Die 16 dae van aktivisme moet vir 365 dae toegepas word."