Saterdagaand skyn Oewerstraat-liggies
Saterdagaand om 20:00 word Oewerstraat in Denneoord aan die voet van die Outeniquaberge weer in ‘n sprokieswêreld omskep. Dan vind die amptelike aanskakeling van die Kersliggies in die straat plaas.
Vir ‘n maand lank sal inwoners en besoekers elke aand duisende Kersliggies en ander versierings kan geniet in dié beroemde straat van George. Die liggies sal elke aand van 19:00 tot 22:00 of 23:30 brand. Dit sal waarskynlik die eerste naweek van Januarie afgehaal word. Die liggies het al ‘n tradisie geword en lok elke jaar duisende inwoners en vakansiegangers van oor die land.
Die liggies kom ‘n lang pad. Niel du Plessis, ‘n inwoner van die straat, het die eerste keer in 2002 liggies aangebring. Sy pa-hulle het destyds toe hulle na Brenton-on-Sea by Knysna verhuis het, vir hom liggies gegee.
Du Plessis het die liggies by sy huis aangebring. Van die ander mense in die straat het dit raakgesien en ook liggies begin aanbring. Aanvanklik was alles op ‘n klein skaal, maar dit het oor die jare uitgebrei.
Deesdae is dit ‘n groot liggiefees en meer as 20 inwoners in die straat is betrokke. Hulle bestee duisende rand aan die liggies en versierings. Dit is vir hul eie rekening. Die kragrekening is ook hul eie verantwoordelikheid.
Gewoonlik is die besigste tyd rondom Kersfees. Du Plessis het aan die George Herald gesê van Saterdagmiddag omstreeks 16:00 sal die inwoners in die straat by braaivleisvure bymekaarkom. Die straat word met die nodige toestemming gesluit. Besoekers is welkom en toegang is gratis. “Dit is meestal vir die kinders aangebring, maar almal, insluitende bejaardes, geniet dit.”
Lees meer by www.georgeherald.com