Amper alles is hier
Wat het George wat hom so ‘n spesiale plek maak om in te woon?
Een antwoord is, ja, George het omtrent alles.
As sentrum vir die Suid-Kaap en die Karoo het George voortreflike opvoedkundige en mediese geriewe, goedsorgende nywerhede en ‘n spektrum van diensbedrywe, grootstad-gelykwaardige inkoopsentrums en boonop ‘n verskeidenheid staatskantore.
Dis alles hier, binne ‘n omtrek van enkele kilometers, en binne bereik van gerieflike parkering, of van ‘n byderwetse stedelike busdiens.
Soms word gesê George is ‘n aftreeplek, kyk hoe baie oumense sien ‘n mens, stokou omies (soos ek) en tannies. Ja, ‘n mens sien heelwat bejaardes, veral by winkels of eetplekke op pensioenarisdae. Maar die teendeel is waar – George is ‘n plek vir die jongklomp.
Hier is 11 hoërskole, waarvan een ‘n volwaardige tegniese hoërskool is, met meer as 12 000 leerders. Beroepsgerigte vakskole. Skole vir ligaamlik gestremdes, vir geestelik gestremdes. Privaatskole en -kolleges van verskillende nerings.
Kolleges vir veelsydige vaardigheidsopleiding. Takkantore van universiteite, met afstandonderrig en nauurse klasse.
Die George-kampus van die Nelson Mandela-universiteit op Saasveld het 1 500 studente. Daar is 70 jong Chinese gegradueerdes wat vliegopleiding ondergaan.
Daar is spesialiseerde kleingroepopleiding vir talle beroepsrigtings.
Die provinsiale hospitaal is die finalejaar-werkplek vir mediese studente van die Universiteit van Kaapstad.
Oumensdorp? Nee wat. ‘n Lewendige jong kleinstad.
Die provinsiale hospitaal word gereken as die beste staatshospitaal in die land. Daarby kom die Mediclinic en spesialisversorgingsplekke vir neoropasiënte, teringlyers, herstellendes en verswaktes. Die meer as 100 mediese spesialiste strek deur alle dissiplines, van pediater tot ortopeet. Daar is boonop patoloë, radioloë, fisioterapteute, sielkundiges, dieetkundiges, oogkundiges … noem maar op.
Dienste wat in George beskikbaar is, is omvattend. Verskeie soorte dienste is 24 uur beskikbaar. Maar wat interessant is,
is die nywerhede.
Aan die suidekant van George is vyf nywerheidsgebiede, en heelparty firmas is oop vir besigheid met die publiek. In ieder geval is dit nuttig om te kyk wat alles hier gedoen en gemaak word. Byvoorbeeld, beskermende oorpakke vir byeboere, of duursame politeen-watertenks, of vervangende plastiek-buffers vir motors.
Dis nie net ‘n geval van maak nie, maar baie keer van regmaak, soos die herstel van masjinerie. Of die selfmaak van ‘n skaars onderdeel. Sowaar, dit is dikwels ‘n verrassing om te sien wat hier byderhand en beskikbaar is. En as dit nie vandag hier is nie, soos sekere motoronderdele, dan is dit môreoggend 10-uur hier. As streek-winkelsentrum vir die Suid-Kaap bied die Garden Route Mall en die aanliggende
Eden Meander ‘n enorme verskeidenheid ware. Al die groot kettinggroepe is verteenwoordig, terwyl koopsentrums in Thembalethu, Pacaltsdorp en elders veel meer as die daaglikse benodigdhede bied. Kleiner winkels in die stadskern maak George spesiaal. Of dit nou leergoedere of borduurmateriaal is, die spesialisplekkies geniet goeie aanhang.
Sukkel jou klok om te tik-tok? Tokkienel is die plek waar jy moet inklok (hy is al 40 jaar in die bedryf). Kyk maar rond, George-sentraal het juweeltjies vir die kieskeurige koper.
Dit alles maak George ‘n gerieflike, aangename plek om te wees.