Etensuurkonsert saam met Ammiel Bushakewitz
Op Woensdag 5 Desember kry Georgiete ‘n geleentheid om die internasionaal bekende pianis, Ammiel Bushakevitz, te hoor in ‘n etensuurkonsert (13:00-14:00) in die NG Moedergemeente. Donasies word ná die konsert ingesamel ten bate van mense in ons dorp wat sukkel met gemoedsversteuring. Die program sluit onder meer Schubert se Wanderer-Fantasie en Liszt se Les jeux d'eaux à la Villa d'Este in.
Ammiel is in Jerusalem gebore en het as jong kind saam met sy gesin in George kom woon. As vierjarige het hy sy eerste klavierlesse van sy moeder ontvang. Vandag tree hy gereeld op in die gesogte konsertsale van Europa, Noord-Amerika, Asië en Australië.
Hy het onderrig ontvang van dosente soos Bertie van Straaten, Mario Nell en Joseph Stanford. As wenner van die Unisa oorsese beurs studeer hy verder in Leipzig, Duitsland, waar hy steeds woon. Van sy CD-opnames het vyf-ster resensies ontvang. Ammiel het ook ‘n passie vir liedbegeleiding en het as sulks met kunstenaars soos Dietrich FischerDieskau en Elly Ameling saamgewerk. Hy bied ook op uitnodiging meesterklasse aan by universiteite in Spanje, Israel, China en Nieu Seeland.
Hierdie geleentheid is ‘n voorreg wat Georgiete wat lief is vir klaviermusiek, nie kan misloop nie.