DA sê portaal-drama is deur burgemeester Naik ontlont
Die voorval in die portaal voor die burgemeester se kantoor verlede week is volgens die D A-kies afdelingshoof, Andricus van der Westhuizen heel moontlik deur George-burgemeester, Melvin Naik, self ontlont.
Van der Westhuizen het by navraag gesê hy is ingelig van die voorval waar 'n aantal raadslede van verskillende partye buite die burgemeester se kantoor betrokke was.
"Volgens inligting aan my oorgedra het burgemeester Melvin Naik, tussenbeide getree toe hy gevrees het dat die Icosaraadslid, Theresa Fortuin, moontlik die wyksraadslid, Cecil Noble van die DA mag uitlok.
"Daar is, volgens my inligting, geen sprake dat burgemeester Naik en raadslid Noble mekaar getakel het en uitmekaar getrek moes word nie."
Volgens inligting het Naik en Noble mekaar bors aan bors aangegluur.
Raadslid Mercia Draghoender was een van die mense wat tussenbeide getree het uit vrees dat die onderonsie in iets erger sou ontaard.
Van der Westhuizen het gesê samewerking tussen alle raadslede is belangrik, want elkeen verteenwoordig die belange van inwoners van George.
"Ek het reeds gevra dat pogings vanaf die DA se kant aangewend sal word om die werksverhouding, te midde van politieke verskille tussen partye, en spesifiek met Icosa te probeer verbeter. Ek wil hoop dat Icosa ontvanklik hiervoor sal wees en nie die nood van inwoners vir partypolitiek sal misbruik nie."
"Ons sien ‘n toename in protesoptrede waar raadslede se huise geteiken word, en hulle gesinne bedreig word. Dit het byvoorbeeld skoolkinders wat eksamen moes skryf, ontwrig. Dit oorskry die grense van vreedsame protes en moet stop."
Daar is, volgens my inligting, geen sprake dat burgemeester Naik en raadslid Noble mekaar getakel het en uitmekaar getrek moes word nie.