Nie ‘n krisis, maar rede om besorg te wees
Dit is nie 'n krisis nie, maar daar is rede om besorg te wees. Dit was die boodskap van 'n vergadering van belanghebbendes in die Tuinroete wat die onlangse uitbreek van die Ebola-virus in Midde-Afrika bespreek het.
Verskeie mense in die Demokratiese Republiek van die Kongo (DRK) het die afgelope tyd gesterf. Dit is nog nie op dieselfde omvang as in 2014-2016 toe meer as 11 000 mense dood is nie.
Met die vakansietyd op hande reis mense meer as gewoonlik. Daar is kommer dat die virus kan versprei.
Tydens die vergadering, wat onder die vaandel van die Garden Routedistriksmunisipaliteit gehou is, is koppe bymekaar gesit oor hoe 'n situasie hanteer moet word as mense in Suid-Afrika met die virus besmet word.
Daar is benadruk dat tot op hede en sover bekend, niemand die afgelope tyd positief vir die virus getoets is nie.
Kommer is tydens die vergadering uitgespreek dat die nasionale departement van gesondheid nie proaktief genoeg optree nie.
Clive Africa, uitvoerende bestuurder: gemeenskapsdienste van die distriksmunisipaliteit, het gesê die doel van die vergadering is nie om alarmisties te wees nie. Voorts nie om die indruk te skep dat 'n krisis op hande is nie. Hy het bygevoeg: "Daar is rede tot besorgdheid en die plan is om proaktief op te tree."
Daar is 'n groot risiko en die virus gaan nie wag tot mense terugkom van vakansie af nie. Die DRK is sowat vier ure per vliegtuig van George. Die feestyd is op hande en mense gaan oor en weer vir hul families in die lande kuier. Daar is baie Kongolese in Suid-Afrika. Daar is aanduidings dat die virus versprei het na Uganda.
Manie Abrahams van die Wes-Kaapse departement van gesondheid, het gesê op die oomblik is daar geen nasionale beheersentrum in bedryf om die situasie te monitor nie. Op nasionale vlak word dit nie gesien as nasionale krisis nie. Mense wat die land binnekom van die geraakte gebiede word "subtiel" ondersoek. Hy is vol vertroue dat as iemand positief gediagnoseer word, sal die land dit kan hanteer.
Volgens sy kollega dr. Terence Marshall is dinge in plek om 'n situasie te kan hanteer as iemand positief getoets word. Daar moet gekyk word wat is elke staatsdepartement se rol in so 'n situasie.