Strande kry dalk blouvlagstatus

Twee van George se munisipale strande, Victoriabaai en Heroldsbaai kan in die toekoms blouvlagstatus kry. Dit het Maandag aan die lig gekom tydens 'n geleentheid waar sogenaamde 'loodsstatus' (pilot-status) amptelik aan die strand by Wilderness toegeken is.

Wilderness sal nou vir 'n jaar aan streng vereistes moet voldoen. Daarna sal besluit word of blouvlagstatus aan die strand toegeken word of nie. Die strand is onder die gesamentlike beheer van die Garden Route-distriksmunisipaliteit en die Georgemunisipaliteit.

Aanduidings is dat George aanstaande jaar aansoek sal doen vir blouvlagstatus vir Victoriabaai en Heroldsbaai. Om dit te kan vermag, sal "loodsstatus" waarskynlik eers toegeken word. Vrae het die afgelope tyd ontstaan oor waarom strande wat onder die alleenbeheer van die George-munisipaliteit is, nie blouvlagstatus het nie. In die SuidKaap is blouvlagstatus vanjaar toegeken aan strande in die Hessequa-munisipale gebied, Mosselbaai, Knysna en Bitou. George het nie vanjaar aansoek gedoen nie.

Melvin Naik, George se burgemeester, het by die bekendstelling in Wilderness aan die George Herald gesê hy wil sien dat die dienste by Wilderness-strand, uitgebrei word na strande soos Victoriabaai en Heroldsbaai.

Oor die rede waarom George nie aansoek gedoen het vir blouvlagstatus vir strande onder sy alleenbeheer nie, het Naik gesê daar is baie streng vereistes

- veral wat die watergehalte betref wat gereeld getoets moet word. Soms is dit selfs drie keer per dag. Hy glo dit is moontlik dat Victoriabaai en Heroldsbaai sal kan kwalifiseer vir blouvlagstatus. Khayalethu Lose, burgemeesterskomiteelid vir gemeenskapsdienste van die distriksmunisipaliteit, het gesê die loodsstatus verseker dat strandbestuur onder die vergrootglas is. Dit sluit watergehalte en openbare veiligheid in.

Clive Africa, uitvoerende bestuurder, gemeenskapsdienste van die distriksmunisipaliteit, het gesê hy is 100% seker dat blouvlagstatus aan Wildernessstrand toegeken sal word. Vir alle praktiese doeleindes het Wilderness-strand reeds blouvlagstatus.

Massimo Mariotti van die nabygeleë Salina's Beach Restaurant het gesê buitelandse besoekers, veral uit Europa, wil weet of 'n strand blouvlagstatus het. Blouvlagstatus is 'n hupstoot vir die plaaslike ekonomie.

Foto: Eugene Gunning Sien video by www.georgeherald.comKhayalethu Lose, (links) en Melvin Naik by die bekendstelling van loodsstatus vir Wildernessstrand. In die agtergrond wapper die vlag wat gehys word by strande aan wie loodsstatus toegeken word.