Pacaltsdorp-ruiters verstom
Shivandré Koranna met sy hings tydens die kompetisie.
Die spesiale verhouding tussen jong ruiters van die Pacaltsdorpperdryklub en hul geliefde perde was 'n riem onder die hart vir die organiseerders en beoordelaars van die klub se Kersskou en prysuitdeling.
Die geleentheid is verlede Saterdag by die Pacaltsdorp-sportterrein gehou en het heelwat belangstelling geprikkel. Toertjies deur waaghalse van die plaaslike Film Equus / Cossacks Riding School was een van die dag se hoogtepunte.
Sowat 40 perde en ruiters het deelgeneem. Kalma Hayes, die organiseerder, was verheug oor die opkoms. Ruiters is beloon vir hul uitnemendheid en die kondisie van hul perde. Hayes help deurgaans om die klublede se vernuf te verbeter, terwyl die klub se voorsitter, Paulen Alaart, die ruiters se entoesiasme aanvuur.
"Die talent wat hier ontluik word, is ongelooflik," het Hayes gesê. "Die klub word vir die afgelope jaar formeel bedryf en wil jong perdeliefhebbers se vaardighede help ontwikkel sodat hulle met ander klubs kan meeding. Perde is wonderlike diere, ons noem hulle landdolfyne. Hulle gee onvoorwaardelike liefde en hierdie kinders vind baat daarby."
Borge van die klub sluit in: Olympia Equestrian Estate, Cape Grain, Buccleugh Contractors en Equilibrate.
Uitblinkers van die jaar
Beste ruiters: Paulen Alaart met Princess en Anvir Michaels met Vonk. Perd in die beste kondisie: Sayid Sharara met Prince. Uithouvermoë en entoesiasme: Curtley da Silva met Survivor.
Groot kampioenperd en ruiter: Jimmy Cupido met Trixie. Reserwe kampioenperd en ruiter: Shivandré Koranna met Blessing. Spesiale toekenning vir die skou:
Eljero April en Ashley Whites.