Sportadministrateur roep na amper 50 jaar halt
Een van die Suid-Afrika se bekendste sportafrigters en -administrateurs, Abrie de Swardt, gaan na byna 50 jaar van direkte betrokkenheid by sport, halt roep.
In die tyd het hy kruis en dwars oor die wêreld gereis om veral atletiekafrigting en administrasie te bevorder.
Die 69-jarige De Swardt, 'n inwoner van George, wil nou meer tyd aan sy familie en persoonlike lewe bestee.
Oor die jare was hy dikwels weg van die huis en hy het meer as 70 lande besoek. Hy het onder meer drie keer die Olimpiese Spele bygewoon en te doen gehad met van die bekendste Suid-Afrikaanse atlete.
Hy het ook die internasionale sportboikot in die jare 60, 70, 80 en 90 beleef.
In sy loopbaan het hy verskeie senior bestuursposte in atletiek beklee.
Hy was ook 'n afrigter van Suid-Afrikaanse spanne by die Olimpiese Spele en vyf keer die afrigter van die Suid-Afrikaanse span by die Wêreldlandloopkampioenskappe.
Voorts was hy betrokke by verskeie tersiêre instellings soos universiteite en kolleges waar hy klas gegee het in sportbestuur en- wetenskap en onderwysopleiding.
Wanneer De Swardt terugkyk oor sy loopbaan, slaan sy groot passie vir sport deur. Aan die begin van sy loopbaan het hy gedroom om eendag op te tree as afrigter by die Olimpiese Spele. Daardie droom het uiteindelik waar geword. Hy het in die 90's self die verwelkoming beleef toe Suid-Afrika weer sy plek op die internasionale sportverhoog kon inneem.
Hy onthou ook die voorafgaande isolasiejare.
Die hartseer van Suid-Afrikaanse atlete wat nie altyd internasionaal kon meeding en aan die Olimpiese Spele kon deelneem nie. Dit het alle rasse geraak. “Dit was 'n verskriklike moeilike tyd in Suid-Afrikaanse sport. Ons het baie ingeboet.
“Daar was baie Suid-Afrikaanse sportmanne en - vroue wat medaljes kon gewen het.” Hy dink aan atlete soos byvoorbeeld Fanie van Zijl, Marcello Fiasconaro en John van Reenen.
Volgens De Swardt was daar in die jare 60 en 70 ongelooflike Suid-Afrikaanse atlete wat onder die topdrie in hul afdelings in die wêreld getel het en nie internasionaal kon meeding om op daardie vlak hul staal te wys nie.
Van die atlete wat oor die jare groot indruk op hom gemaak het sluit in Van Zijl, De Villiers Lamprecht, Dicky Broberg, Van Reenen, Zola Budd en Johan Fourie. Lamprecht was die eerste Suid-Afrikaner wat daarin kon slaag om die myl in minder as vier minute te hardloop.
Hy het baie hoop vir die toekoms van SuidAfrikaanse atletiek. “Hier is baie onontginde talent.”
De Swardt glo afrigting en bestuur van atlete is baie belangrik sodat hulle hul volle potensiaal kan bereik.