Ierse boere kom kuier in die Suid-Kaap
Wortels, pampoene, blomkool en selfs rugby was op die ‘gesels-spyskaart’ toe Ierse boere en landbouleiers die Suid-Kaap besoek het. Die groep van 42 het kom kyk wat hulle van Suid-Afrikaanse landbou kan leer.
Dit kon nie anders dat daar ook rugby gesels is, want een van die plase wat hulle besoek het, was naby George waar Jannie Stander boer. Stander is die pa van CJ Stander wat deesdae een van Ierland se toprugbyspelers is. Tydens die besoek was dit gou duidelik dat CJ groot aanhang in Ierland het. 'n Soortgelyke groep Ierse boere en landbouleiers het in die verlede ook die Suid-Kaap besoek.
Pierre Maassen, Suid-Afrikaanse toergids, wat saam met die jongste groep gereis het, het gesê die meerderheid is melkboere. Hulle is hier om te kyk wat hulle kan leer, veral op melkplase.
Kort na die aankoms van die groep op Stander se plaas, is hulle 'n oorsig gegee van hoe groente in die gebied verbou word en aan wie dit verkoop word.
Volgens Jannie kan hy nie Ierland so gereeld besoek om te kyk hoe CJ daar rugby speel nie, want die boerdery hou hom besig.
Hy het toe verduidelik hoe funksioneer landbou in Suid-Afrika en daarop gewys dat een van die duurste produksiefaktore lone is. Dan is daar oor faktore soos die koste van chemiese stowwe, diesel en elektrisiteit.
In vraetyd wou die Iere onder meer weet oor lone vir plaaswerkers en waar hulle woon.
Hierna is die groep op die plaas rondgewys en hulle het eerstehands gesien hoe groenteplantjies geplant word.
Die besoek is afgesluit met Suid-Afrikaanse braaivleis en binne die plaashuis het die besoekers hulle verwonder aan rugbyfoto's en aandenkings van CJ toe hy nog in SuidAfrika rugby gespeel het.
Jack Murphy, woordvoerder van die groep, het aan die George Herald gesê daar is baie melkplase in Ierland. "Ons kan leer by Suid-Afrikaanse boere. Ons is beïndruk met julle mooi land en die skaal van groenteboerdery."
Die plase in Suid-Afrika is baie groter as in Ierland.
Jannie het gesê die Iere kan leer by SuidAfrikaanse landbou. By hulle is dinge baie meganies, terwyl hier met die hand geplant en geoes word.