Dis die lewensgehalte
Eintlik is dit die leefervaring wat George se eiesoortige karakter kroon, want George se mense is goedgeaard en spontaan welwillend.
Dit beteken dat ‘n goeie en aangename gees heers, ‘n aansteeklike gees van goeie gesindhede.
Die gemoedelikheid van Georgiete beteken dat mense mekaar groet die volgende een in die ry of in die winkel, of die verbyganger op straat, of die toonbankassistent of kassier of pompjoggie.
Dan word maklik geskerts, oor die weer of iets wat gebeur, en so dikwels word totsiens gesê met ‘n goeie wens vir die dag - ‘n mens hoor meermale “geseënde dag!”.
Bedagsaamheid wat Gautengers verbaas, sien ‘n mens dikwels by verkeersirkels. Verkeer van regs het voorkeur, dit is die vaste reël, so die voertuig van regs kom verby - en dan aarsel die tweede voertuig van regs, en wink vir die wagtende een om voort te gaan.
Behulpsaamheid is ‘n kenmerk van winkelpersoneel in die stadskern. Jammer meneer, ons het nie dit nie, maar gaan na die tweede winkel om die hoek en vra vir Dennis, of gaan na so-en-so…
Geen wonder nie dat George so veel liefdadighede het wat die hand uitreik na mense in nood - haweloses en hongeres, gestremdes en diegene met eiesoortige probleme. Ja, daar is selfs ‘n steungroepie vir kindertjies wat van kanker herstel.
‘n Oorwegende gevoel van mense is dat George veilig is. Woonwyke is veilig vir tannies wat soggens om sesuur die troetelwoefie vir ‘n stappie neem, veilig vir solo-stappers en drawwers en fietsers.
Uitstekende gebruiksvriendelike biblioteke het lang diensure om almal te pas en dra by tot die gees van wellewendheid. So ook die ruim keuses van toneelopvoerings en musiekkonserte.
Mense met stokperdjies kan hulle uitleef, daar is ‘n vereniging of klub of groepie vir haas elke denkbare tydverdryf. Sorgsame versamelaars werk elke Woensdag met die modeltreintjies in die vervoermuseum. Die koerant het ‘n hele bladsy met kontakinligting vir belangegroepe en doendinge.
Eweso vir sport, hetsy sommer vir die lekker of mededingend. Een en vyftig sportsoorte is by die Edensportraad gelys.
Die billike prys van kos is ‘n sigbare deel van die positiewe leefervaring in George. Wegneemvis kos selfs minder as die helfte van pryse in binnelandse stede, en goeie maaltye kan vir so min as R40 genuttig word. ‘n Stewige selfhelpmiddagmaal vir pensioenarisse kan kwalik R70 wees.
Dit is mense en die omgewing wat hulle skep, wat in George gestalte aan die lewensgehalte gee - die lewensgehalte wat George so ‘n gawe blyplek maak.
Hierdie is die laaste van drie artikels wat Joh Groenewald oor George geskryf het. Al drie artikels is aanlyn by www.georgeherald.com beskikbaar deur Joh Groenewald in die soeksleutel te tik.