Greta Gericke se invloed onmeetbaar
As Burger en Greta Gericke 76 jaar gelede besluit het om ná hulle troue op ‘n ander dorp wortel te skiet, was daardie dorp vandag beslis ryker en George ontsaglik armer.
Dit gaan nie hier oor geld nie, maar oor inspirasie, gemeenskapsdiens en kultuursake. Hartsgoed wat ware rykdom vergestalt.
Tannie Greta Gericke is Donderdagaand 29 November op die ouderdom van 100 jaar in haar bed, omring deur vier van haar ses kinders, op die familieplaas Die Bof, suid van Pacaltsdorp, oorlede.
Sy was ses weke gelede met haar 100ste verjaarsdag op 12 Oktober nog gesond en het heerlik met die gemeenskap in die NG Moedergemeente se saal gekuier, maar het kort voor haar dood brongitis ontwikkel en vinnig verswak.
Die geliefde tannie Greta, later jare ook bekend as George se Malvatannie, is in 1918 in Kaapstad gebore, dieselfde jaar wat haar alma mater, die Universiteit van Stellenbosch, tot stand gekom het. Haar pa was die parlementslid, dr. Karl Bremer.
In die vroeë 1940’s was sy die eerste student wat by die US ‘n graad in liggaamsopvoedkunde verwerf het, nadat sy ‘n B.Sc voltooi het. Sy het eers in Engeland studeer omdat Stellenbosch toe nog nie liggaamsopvoedkunde aangebied het nie. Sowat 60 jaar later, op ouderdom 80, het sy ‘n meestersgraad aan die einste US verwerf vir haar tesis oor die geloofslewe, lewensuitkyk en lewenswyse van die Afrikaanssprekende in die Georgeomgewing tussen 1920 en 1940.
Tannie Greta het in beide sport en kultuur uitgeblink en was die langslewende lid van die Stellenbosch Universiteitskoor.
Sy en haar man het ook die
George Volkspelebeweging gelei en Europese volksdansgroepe het dikwels by hulle op Die Bof oornag. Tot op ouderdom 52 het sy nog vir SWD hokkie gespeel en word erken as die persoon wat vrouehokkie in die Suid-Kaap van die grond gekry het. Sy was ook ‘n kranige swemmer en het op 83 ‘n bronsmedalje vir die Suid-Kaap by ‘n nasionale kompetisie losgeswem.
Maar, tannie Greta se navorsing oor George, haar volksdanse en bydrae op sportgebied is nie al waarby Georgiete gebaat het nie. As onderwyseres het sy ‘n groot indruk op geslagte kinders gemaak en haar hart en hand was oop vir almal wat sy kon help. Een van haar hartsprojekte was die dienssentrum vir bejaardes in Thembalethu, en tot op ouderdom 95 het sy elke week produkte uit haar groentetuin daar gaan aflaai. Sy het die inwoners ook verskeie vaardighede geleer en ‘n groentetuin help aanlê. Sy was oor die jare die dryfkrag agter talle welsynsprojekte en was intens betrokke by die verfraaiing van die dorp. Sy het in 2008 inwoners begin aanmoedig om malvas te plant en so die dorp in rooi te tooi - vandaar die eretitel ‘Malvatannie van George’.
Tannie Greta is in haar leeftyd deur verskeie instansies vereer en het onder andere die Vryheid van George sowel as ‘n ATKVkultuurtoekenning ontvang en is deur lesers aangewys as Group Editors se 2009 Mees Inspirerende Vrou in die Tuinroete.
Tannie Greta se wederhelf, die Georgiet Burger Gericke, het nie teruggestaan vir sy vrou nie en uitgeblink as proteaboer wie se blomme internasionaal in aanvraag was. Hy het talle Volkspele-toere gelei en volksliedjies geskryf, maar sy grootste talent was om die perfekte vrou te kies! Op 16 Desember 1942 is hy met Greta Bremer in Hermanus getroud - ‘n groot aanwins vir George en sy mense. Hy is op 2 Januarie 1989 oorlede. Almal wat tannie Greta geken het beskou haar dood as die einde van ‘n era, maar hoop dat die goedheid en uitnemendheid wat sy gesaai het, nog geil in George sal groei.
Haar sangeresdogter, Elisabeth Potgieter, sê die familie en vriende is ongelooflik bedroef, maar dat hulle vertroosting vind in al die wonderlike herinneringe. “Haar invloed was onmeetbaar en haar voetspore lê oral.” Die begrafnisdiens word Saterdag 15 Desember om 11:00 by die NG Kerk Tuinedal in Palgravestraat gehou. Die diens word op Tannie Greta se versoek deur ds. Christoff Barnard gelei.
Potgieter sê daar is op dié datum besluit om roubeklaers van ver te akkommodeer. Tannie Greta word oorleef deur ses kinders, 26 kleinkinders, 31 agterkleinkinders en twee agter-agterkleinkinders - die jongste is Maandag 3 Desember gebore. Group Editors en George Herald het deur die jare gereeld oor tannie Greta se reusebydraes berig en sal George se vonkelvrou geweldig mis, maar altyd onthou. Greta Bremer trou op 16 Desember 1942 met Burger Gericke.