Die belangrikheid van klein sakeondernemings
Die bydrae wat opkomende entrepreneurs kan maak tot die groei van 'n dorp of 'n stad se ekonomie, is onder die vergrootglas geplaas tydens 'n opleidingsgeleentheid van die AHi Wes-Kaap in George.
Die opleiding is deur die AHi Wes-Kaap aangebied in vennootskap met TRIAS, 'n internasionale ontwikkelingsorganisasie wat bande het met die Vlaamse regering in België.
Dr. Willie Cilliers, voorsitter van die AHi Wes-Kaap, het by navraag gesê die jongste opleiding het plaasgevind na aanleiding van vorige streekkursusse wat in onder meer De Rust, Uniondale, Thembalethu, George en Swellendam gehou is. Die geleenthede is elkeen bygewoon deur tussen 20 en 25 mense. Die topkandidate is toe gekeur en na George genooi om aan die volgende fase van opleiding by die AHi Wes-Kaap se hoofkantoor deel te neem.
Altesaam 15 mense is na die jongste kursus genooi wat oor vyf dae gestrek het. Lesings is deur kundiges aangebied en deelnemers kon vrae vra. Aandag is onder meer gegee aan die volhoubaarheid van besigheidsmodelle en finansies en administrasie in 'n sakeonderneming.
Al die entrepreneurs kon hul onderskeie besigheidsplanne aan 'n paneel van kundiges voorlê.
Dit is deur die paneel ontleed en uiteindelik is wenners aangewys. Die deelnemers het gewissel van 'n vis en skyfie-onderneming tot 'n maatskappy wat spesiale geleenthede (events) aanbied en spyseniering verskaf.
Die wenner van die eerste prys het R5 000 ontvang. Die wenner van die tweede plek het R3 000 ontvang en die wenner van die derde plek R2 000. Die wenners kan nou die geld gebruik om hul ondernemings te bevorder.
Volgens Cilliers gaan die AHi Wes-Kaap nou fokus op die groep. Mentors word vir hulle aangestel en hul vordering sal dopgehou word. 'n Praktiese benadering word gevolg.
Soortgelyke geleenthede het reeds plaasgevind in Kaapstad en aan die Weskus.
Die plan is om die kursusse weer aanstaande jaar in die onderskeie streke aan te bied. Mense sal in hul streke aansoek kan doen om dit by te woon.
Cilliers het gesê die afgelope twee jaar het die AHi Wes-Kaap gehelp om sowat
2 000 nuwe werksgeleenthede te skep. Dit is byvoorbeeld deur opleiding vir mense wat eenman-ondernemings begin het. Van die ondernemings het later uitgebrei en meer mense in diens geneem.
Cilliers glo klein sakeondernemings is die hart van 'n dorp se ekonomie en die bevordering daarvan moet meer aandag kry.