Meningsverskil oor integrasie en verdigtingsvoorstelle
Alida de Beer
Dr. Andy Lamont, bekende Pacaltsdorper en voorsitter van die George-erfenistrust, meen dat toekomstige ontwikkelings wat volgens die konsep-ruimtelike ontwikkelingsplan by die ingange van die dorp kan plaasvind, ‘n erge negatiewe impak op die historiese ruimtelike landskap sal hê.
In 'n sterk bewoorde brief in vandag se briewekolom (bladsy 41) verwys hy na die "blatante verontagsaming" in die ROP van die kulturele landskap, met verwysing na onder meer Yorkstraat en Knysnaweg. "Die ruimtelike belangrikheid van Yorkstraat en die kulturele landskappe wat by die ingange na die stadsgebied geskep is, verdien beskerming."
Hy sê die erfenisregister van die munisipaliteit skiet egter tekort. Selfs die oudste gebou in George, die 1815 Patathuis in Missionweg in Pacaltsdorp, is nie daarin opgeneem nie. George Herald het voorheen berig oor ontevredenheid oor die proses wat gevolg is met die saamstel van die inventaris. Alle erfenishulpbronne moet daarin gelys wees. Dit is die primêre verwysingsbron wat gekonsulteer word wanneer aansoeke ten opsigte van historiese geboue oorweeg word.
Voorstelle oor verdigting en integrasie in die konsep-ROP het positiewe en negatiewe kommentaar ontlok, veral die hoëdigtheidsbehuising wat in Glenwood en by King George-park voorgestel word.
Raadslid Gert van Niekerk van die Vryheidsfront Plus het gesê dit is reeds in Pretoria bewys dat sulke ontwikkelings misluk. "Wie gaan 'n sogenaamde bufferhuis van meer as 'n miljoen rand koop langs 'n huis wat die grootte van 'n dubbelmotorhuis is? Hiermee saam kom die Wendy-huise en misdaad. Die VF + het geen probleem met integrasie nie, maar dan moet dit oordeelkundig gedoen word. Hoekom moet inwoners wat hul spaargeld gebruik het om in 'n sekere buurt te belê, se eiendomswaarde verlaag word? Ons dorp se karakter en atmosfeer gaan heeltemal verander.” Hy George Herald het voorgestel dat die grond langs die karavaanpark in Yorkstraat gebruik word vir bekostigbare behuising.
Raadslid Virgill Gericke van die
Pacaltsdorp Besorgde Inwoners sê integrasie en transformasie van gemeenskappe moes lankal begin het. Die model van aparte ontwikkeling skep ongemak en hou gemeenskappe uit mekaar. “Of dit nou vyf jaar of 20 jaar neem, dis essensieel.”
Verdigting moet egter omsigtig hanteer word. "Ons moet die waarde van eiendom en dit wat ander mense opgebou het, respekteer. Ons kan nie in 'n massa gaan afpak en dink mense moet tevrede wees nie, maar terselfdertyd moet voorsiening gemaak word vir die middelklas en vir alle gemeenskappe. Eksklusiewe ontwikkelingsmodelle kan nie vir altyd aangaan nie. Almal kan ook nie dorp toe trek nie. Sakenodusse in plekke soos Pacaltsdorp en Blanco is noodsaaklik om dienste nader aan die mense te bring.”
Die voorsitter van die EFF in die SuidKaap, Seayne Maarman, het die George Herald verwys na die party se verklaring op Facebook waarin hulle dit stel dat ruimtelike geregtigheid noodsaaklik is om ‘n meer gelyke George te bou. “Ons sal nie rassiste toelaat wat baklei om hulle voorregte te behou nie, en ook nie die rasgeoriënteerde ruimtelike ontwerp van George nie. George en die meeste munisipaliteite in die Wes-Kaap benodig dringend ruimtelike beplanning wat ons mense toegang gee tot en nader bring aan goeie huise, werkgeleenthede, goeie skole, gesondheidsfasiliteite, sportfasiliteite en parke.” Die party veroordeel ‘n aanlynpetisie wat die King George-inwonersvereniging geloods het en noem dit ‘n “elitistiese, anti-armoede agenda wat die sosiale beweeglikheid verhoed van professionele mense wat huise by die behuisingsontwikkeling daar kan bekostig.”
Andrikus van der Westhuizen van die DA sê integrasie en verdigting is die professionele standpunt van stadsbeplanners en is ‘n huidige denkrigting wêreldwyd. “As ons wil hê dat openbare vervoer moet werk, dan is verdigting noodsaaklik. As ons ons groen omgewing wil bewaar, kan ons nie stedelike kruip onbeperk toelaat nie. As ‘n mens ‘n langtermynvisie het, het jy nie eintlik ‘n ander keuse nie.” “’n Klomp mense oor ‘n breë ekonomiese spektrum wil George toe kom. As jy die las op infrastruktuur probeer bestuur, dan is daar net ‘n sekere rigting wat jy kan inslaan. Wat integrasie betref, moet ons die ou ruimtelike orde probeer afbreek en vir mense bekostigbare behuising nader aan hul werk verskaf."
Die ANC se hoofsweep, Nomawethu Jantjies, het teen druktyd nog nie op ‘n boodskap wat gelaat is, gereageer nie.