Geskenke en kospakkies sorg vir groot vreugde
Kinders en bejaardes se harte is Saterdag verbly toe hulle kospakkies en geskenke van ‘n gemeenskapsgebaseerde organisasie, Hands On Charity Runners, ontvang het.
Vrywilligers het kort na 08:00 ‘n braai en speletjies vir kinders by Bethesda aangebied. Die kinders het ook geskenke ontvang.
Kort voor 12:00 het die vrywilligers na die Rosemoor-tehuis vir bejaardes gegaan waar kospakkies en geskenke uitgedeel is. Nie eers beurtkrag kon die geesdrif demp nie.
Die kinders en bejaardes het met groot dankbaarheid en glimlagte die geskenke ontvang. Die braaivleis, kospakkies, geskenke en ander aktiwiteite is moontlik gemaak deur die ruim ondersteuning en hulp van privaat maatskappye en ander instansies.
Adrian Anders en sy suster, Beryldine Anders, was onder meer betrokke by die koördinering van die geleenthede.
Adrian het vertel dat die kospakkies en geskenke uitgedeel is in die gees van Kersfees. “Kersfees kom nou bietjie vroeër.” Sommige van die inwoners se familie kom haal hulle op Kersfees en dan is hulle nie by die tehuis nie.
Dit is tweede keer dat die organisasie betrokke is. Hulle het dit ook in 2016 gedoen. Van die geskenke wat uitgedeel is, is deur vrywilligers betaal.
Die organisasie beplan om elke jaar iets tot voordeel van die gemeenskap te doen. Aanstaande jaar is die plan om die DBV op Oudtshoorn te help. “Ons is van voorneme om seile en dakke vir die diere aan te bring en ons wil ook kos vir die diere voorsien.”
Volgens hom verskaf dit baie vreugde om die blydskap te sien van die mense wat gehelp word. Oom Hendrik Speelman (99), die tehuis se oudste inwoner, was baie bly oor die kospakkie wat hy ontvang het.
Op die vraag hoe hy dit regkry om so oud te word, het hy geantwoord: “Dit is al die pap wat ek geëet het.”
Hy het voorheen gerook, maar later opgehou. Saterdag wou hy weet waar is sy druiwe waarvoor hy baie lief is.
Adrian het gesê mense wat hulle in die toekoms wil help kan hom bel by 074 497 8690.
Personeel by die tehuis vir bejaardes kon tydens die George Herald se besoek nie uitgepraat raak oor al die hulp nie en het hul dank teenoor die betrokkenes uitgespreek.