Garden Route-gholfklub se spelers trotseer toernooi sónder klubhuis
Gholfspelers van die Garden Route-gholfklub het op Saterdag 1 Desember, seker gemaak hulle klubkampioenskapkompetisie verloop sonder enige haakplekke.
Ofskoon die klubhuis onlangs afgebrand het, is daar na die 36-putjies op die baan behoorlik feesgevier met 'n spitbraai. Die klubkampioene van 2018 is Francois Kleyn in die mansafdeling en Monique van Eeden, in die afdeling vir vroue.
Archie Sansom, die klubkaptein, het almal bedank vir hul ondersteuning deur die jaar. "Ek glo die klub gaan van krag tot krag in die Nuwejaar. Ons gaan ons nie laat onderkry deur die uitdagings wat ons nou in die oë staar nie," het hy gesê. "Ons gaan voort om by Rooirvierrif se sportterrein gholf te speel en sal die probleme een-een hanteer. Ons gaan nie moed opgee nie."
Die spelers het gazebo's opgeslaan en 'n mobiele toilet gehuur om seker te maak hulle kan in redelike gerief partytjie hou na 'n dag op die setperk.
Sansom bedank Mosselbaaien Kingswood-gholfklub, sowel as Sandy Haddad, 'n plaaslike onderneming, vir hul hulp om van die dag 'n sukses te maak. "Sonder hulle sou ons nie 'n toernooi kon hou nie," het Sansom gesê.