George terug in vergrote Premierliga
Die SWD-rugbyunie het aangekondig dat die Premierliga in 2019 met twee spanne vergroot sal word.
Dié besluit maak die deur oop vir Georgerugbyklub, vanjaar se naaswenner in die Presidentsliga, om weer in die unie se topliga uit te draf.
Jaquars van Plettenbergbaai, vanjaar se Presidentsliga-kampioen, is die ander nuwelingspan. Maori's, wat na die Presidentsliga sou afskuif, bly nou in die Premierliga en sal as die twaalfde span daaraan deelneem.
Die ander spanne in die Premierliga is Progress, Evergreens, Crusaders, Silver
Stars, Blanco, Bridgton, Barbarians, GrootBrakrivier en Heidelberg.
George-rugbyklub het reeds met sy voorseisoense oefeninge begin, maar die eerste amptelike oefening begin op Maandag 7 Januarie 2019 op Outeniquapark se B-veld om 18:30.
Verskeie nuwe spelers het hulle reeds by die klub aangesluit. George het nagenoeg 90% van sy eerstespanspelers behou wat hom 'n sterk mededingende span in die Premierliga kan maak. Spelers wat by George wil aansluit, kan die visevoorsitter, Jacques van Reenen, bel by 084 406 2912 of die hoofafrigter, Jonathan Botha, by 084 800 2503, vir meer besonderhede rakende aansluiting.
George-rugbyklub is reeds druk besig met die organisering van 'n groot rugbynaweek op 15 en 16 Februarie 2019 wat hulle op Outeniquapark se A- en B-veld gaan aanbied.
Spanne van ander unies wat reeds hul deelname bevestig het, is Durbell van Durbanville, Brackenfell, Helderberg, Despatch rugbyklub. Plaaslike spanne soos George, Crusaders, Evergreens, Mosselbaai, Knysna United en Young Roses het ook ingeskryf.
Die finale tye en program sal vroeg in 2019 bekend gemaak word.
George-rugbyklub wil afrigters met klubrugbyondervinding nooi om aansoek te doen en deel te raak van sy afrigtingkorps vir 2019.
Daar is ook plek op die klub se bestuur vir drie addisionele lede en 'n spanbestuurder. Belangstellendes met ondervinding kan hul CV's na pjulyan@gmail.com stuur.