Leerder bederf ná sy matriekafskeid mis
Rolandi Strydom en haar kêrel, Schoeman Vorster, elegant uitgevat en gereed om per trok te vertrek.
Alida de Beer
Rolandi Strydom van Hoërskool Outeniqua het uitgesien na haar matriekafskeid saam met haar kêrel, Schoeman Vorster. Haar elegante swart rok het klaargemaak in die kas gehang en sy kon nie wag vir hierdie hoogtepunt van haar skoolloopbaan nie.
Toe trek 'n ernstige niersiekte haar skielik plat en sy beland vir twee weke in die hospitaal voor die afskeid. Terwyl haar maats terugskouing gehou het oor die groot aand, was sy die dag ná die afskeid op pad na die Groote Schuur-hospitaal. Matriekafskeid was 'n ervaring waarvan sy nooit enige herinneringe sou hê nie. Maar verlede week het Rolandi 'n verrassing gekry toe Solidariteit Helpende Hand haar uit die bloute laat "ontvoer" het vir 'n mooimaaksessie voordat sy haar rok moes aantrek om foto's saam met Schoeman te laat neem.
"Ek is eers na die haarkapper geneem en daarna vir 'n grimeersessie. Toe is ek huis toe om te gaan aantrek," vertel Rolandi.
Sy was weereens verras toe 'n blinkgevryfde, groot rooi trok voor die huis stilhou. "Schoeman is 'n trokdrywer en my pa is baie lief vir trokke. Op dié manier het ek 'n liefde vir trokke ontwikkel. Ek het altyd gesê ek wil in 'n trok na my matriekafskeid toe gaan."
Hulle is na Chaverin Stables, die plaas waar haar perd loop, waar foto's geneem is. Die dag is afgesluit met 'n heerlike ete saam met Rolandi se ouers by La Capannina.
Marieta Verwey van Helpende Hand, wie se idee dit was om Rolandi so te bederf, sê sy het Thea Abraham, die onderwyser wat Rolandi tydens die skryf van haar eindeksamen bygestaan het, by 'n onlangse musiekkonsert ontmoet. Dié het haar van Rolandi se teleurstelling en siekte vertel. Verwey het daar en dan besluit om vir Rolandi 'n spesiale aand te reël.
Rolandi se mooi kapsel is gedoen deur Mara Gericke van Salon Mareese. Die skoonheidsafdeling by E Coetzee-apteek het haar grimering behartig en deur Thea Abraham se intrede is die trok goedgunstiglik deur Auto Phoenix verskaf.
Al het Rolandi nie 'n ware matriekafskeid self beleef nie, het hierdie geleentheid voorwaar opgemaak daarvoor en gesorg dat sy wel spesiale herinneringe het wat sy in haar hart kan bewaar.
Rolandi se siekte is weens die verstopping van 'n nierkamer veroorsaak. Behandeling wat sy ontvang het, het groot verbetering gebring, maar sy is nog nie heeltemal gesond nie. Daar word steeds toetse op haar gedoen.
Die dapper leerder het haar eerste vraestel geskryf met dreineringspypies in haar lyf en moes haar hele eksamen in isolasie aflê.
Rolandi sê sy kon baie min leer omdat sy geweldig moeg geword het. Sy het dit aanvanklik oorweeg om haar matriek eerder volgende jaar klaar te maak, maar met die bystand van Abraham het sy deurgedruk. Nou wag sy in spanning op die uitslae, want sy wil volgende jaar begin met haar studies vir 'n mediese forensiese ondersoeker.
Ek is eers na die haarkapper geneem en daarna vir ‘n grimeersessie. Toe is ek huis toe om te gaan aantrek.