Wyk 18 stem op 10 April
Inwoners van wyk 18 gaan in minder as 'n maand twee keer by die stembus 'n draai moet maak. Die munisipale tussenverkiesing vind op 10 April plaas en minder as 'n maand later, op 8 Mei, vind die algemene verkiesing plaas.
Die wyk het vakant geraak na die onverwagse bedanking van die DAwyksraadslid, Jannie van der Westhuizen.
Wyk 18 sluit in 'n deel van Denneoord, Twee Rivieren, Bo-dorp, GeorgeOos, Denverpark en Loeriepark. Dit is tradisioneel 'n DA-wyk.
Gert Niehaus, van der Westhuizen se voorganger vir die DA in die wyk, staan die keer daar vir die ACDP. Niehaus het verlede jaar die politiek vaarwel geroep, maar sy afwesigheid was van korte duur en is hy die afgelope paar maande aktief in die ACDP. Johan du Toit, voorsitter van die ACDP in George, het amptelik bevestig dat Niehaus die party se kandidaat is.
Niehaus was voorheen vir ses jaar die wyksraadslid. "Ons glo hy sal wen. Hy staan op aandrang van inwoners en hy het voorheen 'n goeie verhouding gehad met die inwoners in die wyk." Of dit egter kiesers na die stembus sal lok, is 'n ope vraag. Kommer heers in George se politieke kringe dat die stempersentasie laag kan wees.
Du Toit sê die stempersentasie mag dalk laag wees, want dit is naby die algemene verkiesing.Darryl Sauer van die ANC het gesê die party het nog nie finaal besluit of hy aan die tussenverkiesing gaan deelneem nie.
Bazil Petrus van SAC en GOOD het gesê die twee partye sal beslis nie deelneem nie. "Ons fokus is nou op die nasionale verkiesing." Adv. Gert van Niekerk van die VF Plus het gesê hy sal die party se vaandel dra. Die feit dat dit so naby aan die algemene verkiesing is, bemoeilik dit glad nie vir die party nie. "Trouens ons sien uit na die tussenverkiesing." Die klem in 'n munisipale verkiesing is ook 'n bietjie anders. "'n Wyksraadslid moet omsien na die belange van die inwoners en nie net na die belange van 'n politieke party nie," het hy gesê. Jaco Londt, voorsitter van die DA se oosstreek, het gesê Donovan Gultig, sal die DA se vaandel dra. Gultig (39) is 'n stigterslid van die buurtwagte in Blanco, Heatherlands en Glenbarry en is die voorsitter van 'n DA-tak.
"Ons vertrou ons sal die wyk behou." Volgens Londt sal hy eers kommentaar lewer oor die ander kandidate wanneer die OVK se kandidaatlyste vir die tussenverkiesing gesluit het.
*The by-election in ward 18 will be held on 10 April, less than a month before the general election on 8 May. Voters will therefore go to the polls twice in less than a month. The vacancy in ward 18 came about after the resignation of Jannie van der Westhuizen of the DA.