Aansoek vir hutte se afbreek val plat
Onwettige grondbesetters van New Dawn Park wat sedert einde Januarie in plakkershutte op 'n stuk grond langs New Dawn Park Primêr woon, kan vir eers rustig slaap.
'n Dringende aansoek om 'n hofbevel om die grondbesetters te verwyder, is ongeldig verklaar.
Die besluit is Maandag in die Georgelanddroshof geneem, nadat die groep se regsverteenwoordiger, Stephan Kleynhans, die aansoek teengestaan het.
Die aansoek om 'n dringende hofbevel is deur die Wes-Kaapse departemente van openbare werke en onderwys gebring. Die grond behoort aan openbare werke en die departement van onderwys het volgens inligting planne om 'n skool daar te bou.
Die dringende aansoek is op so 'n manier bewoord dat dit inwoners verhoed om nuwe strukture te bou en keer dat nuwe mense op die perseel kan kom. "Dit is nie 'n interdik om af te breek en te verwyder nie," het Kleynhans gesê.
Die Rooimiere, het verlede Dinsdag verskeie wonings op die stuk grond afgebreek. Kleynhans het gesê dat die eenheid, luidens inligting aan hom verskaf, die regte plekke afgebreek het. Hulle mag egter nie aan die
46 plakkershutte wat reeds bewoon word raak nie.
"Dié hutte is tydens die Rooimiere se besoek met rooi kruise gemerk. Hierdie strukture mag eers bly," het hy gesê.
Volgens Kleynhans het die twee betrokke departemente aangedui dat hulle Vrydag (môre) 'n PIE-aansoek (The Prevention of Illegal Eviction from and Unlawful Occupation of Land) na die Kaapse hooggeregshof wil bring. Indien die aansoek goedgekeur word, mag die hutte wel afgebreek word.
"Die moontlikheid bestaan dat die regter beslis dat George-munisipaliteit binne 30 dae 'n plan voorlê wat aandui hoe hulle die situasie gaan beredder. Indien die aansoek gunstig oorweeg word kan ons dit steeds opponeer," het Kleynhans gesê.
Vergadering op Eenheidspark
Die groep onwettige grondbesetters het Maandag al die pad van New Dawn Park na die George-landdroshof gestap om hul lot te hoor. Raadslede en lede van die PBI en Icosa, sowel as die Pacaltsdorp Khoi-raad, het as leiers vir die groep opgetree. Nadat Virgill Gericke van die PBI die groep oor die nuutste verwikkelinge ingelig het, het die verkeershoof, Donovan Saptoe, ook met die groep kom praat. Daar was vroeër sprake van 'n vergadering wat sou plaasvind met provinsiale en munisipale amptenare. Saptoe wou terugvoering in die verband gee. Hy het egter die nuus oorgedra dat hy werklik geen nuus vir hulle het nie. Die leiers het vir Saptoe bedank vir sy besoek, maar dit duidelik gestel dat hulle nie wil hê hy moet as boodskapper dien nie. "Ons is lief vir jou, maar moenie dit weer doen nie," het die tradisionele leier, Stanley Laminie, gesê.