Oupa Jannie erg opgewonde
Oupa Jannie. Dis nog iets waaraan hy gewoond moet raak, maar hy is baie opgewonde daaroor. So vertel Jannie Stander, pa van die Suid-Afrikaans gebore rugbyspeler, CJ Stander.
Stander, wat deesdae vir Ierland uitdraf, en sy vrou Jean-Marié Neethling, verwag hul eersteling. Jannie en sy vrou, Amanda, boer op 'n plaas net buite George waar CJ grootgeword het.
Jannie het aan die George Herald gesê dit is die eerste keer dat hy en Amanda oupa en ouma word. Dit is ook vir die Neethlings, wat in Bloemfontein woon, 'n eerste kleinkind.
"Dis 'n dogtertjie, maar hulle het nog nie 'n naam nie. Na verwagting sal die kleintjie teen middel Augustus gebore word."
As CJ die Iere se rugbyspan haal vir die Wêreldbekertoernooi, sal hy ongelukkig nie dan tuis wees nie. Hy sal reeds in Japan wees ter voorbereiding van die toernooi.
Volgens Jannie is hy baie bly oor die vooruitsig om oupa te word.
"Ek was skoon hartseer toe ek die nuus gehoor het. Ouma Amanda het die afgelope naweek in Bloemfontein 'n ooievaarstee bygewoon. Sy is nou op pad terug en ook baie opgewonde. Sy het al klere vir die kleintjie gekoop en nou sit ek met 'n klererekening," het Jannie gespot. Beide Amanda en CJ se skoonma, San-Marié sal by Jean-Marié met die bevalling in Ierland wees.
Die plan is dat CJ, Jean-Marié en die nuwe kleinding saam met die Standers in Desember vakansie kom hou by Hartenbos. Dit sal die eerste keer in jare wees dat CJ in Desember in die Suid-Kaap sal wees.
Op die oomblik is CJ beseer, maar hy behoort oor 'n paar weke weer gereed te wees om te kan speel.