Ukuwela help leerders
Die Ukuwela-program van Carpe Diem verrig wondere en verander baie lewens. Suzanne Stark, 'n arbeidsterapeut by die skool, wie se idee dit was om leerders te help werk kry, het sover 'n groot verskil gemaak. Die program bied 'n geleentheid aan leerders met gestremdhede om 'n werk te kry, te behou en waar hy of sy 'n inkomste kan verdien. Stark sê in sommige gevalle is daardie leerder die enigste broodwinner in die huis. "Die program help ook dat daardie leerder na skool nie net by die huis gaan sit en niks doen nie."
Stark werk saam met nog 'n arbeidsterapeut,
Lee-Ann
Arendse, en twee beroepsvoorligters wat help om die leerders voor te berei vir die werksplek. "Ons vat hulle deur die onderhoudsproses, gesels oor wat verwag kan word en hoe om sekere situasies te hanteer," sê Arendse.
Die werk was ook 'n droom wat waar geword het vir haar. Sy vertel deel van die program is dat hulle saam met daardie leerders in die werksplek moet wees. "Hier maak ons seker of hulle die werk kan doen, hoe hulle kommunikeer, hoe hulle sekere situasies hanteer en ook om oor vordering met werkgewers te gesels. Dan onttrek ons geleidelik," sê Stark. Sy sê hulle praat met die leerders oor hul belangstelling, in watter werksomgewing hulle hulself sien en wat hulle graag wil verdien.
Deel van die program is om op vrywillige basis te werk terwyl die kind nog op skool is voor fase twee waar hulle in die werksplek geplaas word. Stark sê Ukuwela is 'n Xhosa woord wat beteken "to cross over". So hulle is daar vir die oorgangsfase van skool na werksplek.
Daar is Dinsdagoggend 'n ontbyt by die Protea Hotel King George gehou om alle leerders wat reeds werk, 'n geleentheid te bied om met mekaar te gesels. Twee van die leerders het ook 'n 'Vasbyt-toekenning' gekry vir hul jaar lange plasing in die werksplek. Bradley Roelfse (19) sê hy kan nou swembaddens skoonmaak en weet hoe om die water te toets. Hy kan ook algemene takies as nutsman verrig. "Ek sal graag eendag vir myself wil werk," sê hy. Fransiena Fouchè (19) sê sy sal graag met kinders wil werk, maar is bly oor die werksondervinding wat sy in die wassery kry waar sy nou werk.