St. Mary’s vier vanjaar 90 jaar

Om 90 jaar oud te wees is beslis ‘n mylpaal wat nagestreef moet word. Ons verwys hier na ‘n skooltjie wat in 1929 met een onderwyser en ongeveer 30 leerders begin het en vandag, 90 jaar later, met ’n opvoedertal van 29 en ‘n leerdertal van nagenoeg 860 leerders, steeds groei.

St. Mary’s Rooms Katolieke Skool in Beerstraat, Rosemoor, is ongetwyfeld oor dekades heen een van die bekendste skole in George-omgewing. Met sy nederige begin in 1929, waar die eerste groepie leerders van destyds op tamatiekissies gesit het, is dit uit dieselfde skoolgebou waar vandag se groot sportsterre, besigheidspersoonlikhede, professionele individue en entrepreneurs deur hul toegewyde opvoeders, hul inspirasie gekry het om hul rol in die land te speel.

Die kerk het ‘n formidabele rol gespeel in die stigting en totstandkoming van baie opvoedkundige instansies, so het die Rooms Katolieke Kerk ook ’n rol gespeel in die totstandkoming van hierdie besondere skool. Tot vandag, is die kerk steeds die hoeksteen waarop opvoeding in die breë, geskoei is by hierdie besondere skool en die gemeenskap waar die skool se voedersbron uitgebrei het vanaf Rosemoor na Borcherds, Conville, Proteapark, Thembalethu, Pacaltsdorp en selfs Denneoord.

In die George, Mosselbaai en Oudtshoorn-omgewing is St. Mary’s

(R.K.) Primêr een van vyf katolieke skole, wat ‘n goeie aanduiding is van watter inslag die kerk gehad het, en steeds het in die opvoeding van ons jeug.

Om 90 jaar oud te wees, moet behoorlik gevier word en elke leerder, opvoeder, skoolhoof, selfs predikant, ouer en ondersteuner wat sedert 1929 met hierdie skool geassosieer word, word genooi om deel te word van hierdie jaar se feesverrigtinge. Met die skool se leuse “FIDELITAS” (Getrouheid), word dit op die voorsate van die skool se harte gelê om die skool getrou te ondersteun en wil die skool ook langs hierdie weg alle trotse ouers bedank vir hul getroue ondersteuning deur die jare.

Dit is ook heel toevallig dat sedert 1 Januarie 2019, die skool se eie oudleerder, Laurentius Muller, die 6de trotse hoof van hierdie skool, geword het. Hy nooi een en elke ondersteuner van St Mary’s (R.K.) Primêr om betrokke te raak by ‘n skool wat diep spore in die gemeenskap, die distrik en die land getrap het en om deel uit te maak van die feesviering hierdie jaar. Met die groei van die skool, is daar vele uitdagings waarmee hy as nuutaangestelde hoof, die skool na die volgende vlak moet neem.

Aan die onderwysfront sal die volgende vyf jaar groot uitdagings aangepak word onder andere eise van die tegnologie in die onderwys, nastreef van ‘n verbeterde slaagpersentasie, die verstewiging van ‘n waardestelsel by leerders, aanbring van meer lokale vir onderrig.

Die sport- en kulturele vleuel van opvoeding, bring ook sy eie uitdagings en is een van die kenmerke wat hierdie skool waarop almal in George, trots is, en sal verder voortgebou word.

Feesviering vir die 90-jarige bestaan van die skool, begin op 1 Maart met ‘n dans wat sal plaasvind in die Georgegemeenskapsentrum in Yorkstraat. Elke kwartaal sal daar ‘n aktiwiteit plaasvind wat gepaard gaan met die 90 jarige viering.

Vir verdere inligting kan die skool by

044 8758 450 gekontak word.