Blinde skrywer Gerhard Ferreira (70), stel boek bekend by biblioteek
George-biblioteek het Donderdag 'n blinde skrywer, Gerhard Ferreira (70), die geleentheid gegee om sy boek, Ons moet spoeg om te sien hoekom ons nie kan sien nie, aan genooide gaste bekend te stel. In die gees van Valentynsdag was die tema, A blind date with a book, vertel Debra Sauer, 'n woordvoerder van die munisipaliteit. "Dit was nie die amptelike bekendstelling nie, maar slegs 'n voorlesing van sekere gedeeltes van die boek in die voorportaal van die George-biblioteek."
Sy vertel Ferreira, ‘n blinde afgetrede bestuurder van opleiding en afrigting in die Sakebankafdeling het as seun stadig blind geword. "Die boek bevat van sy mees gewildste stories en het pas by Naledi verskyn." Die stories handel oor die wel en weë in die lewe van 'n blinde persoon in 'n sienende wêreld, met die klem op die humoristiese en komiese situasies waarin 'n blinde persoon hom/haarself dikwels kan bevind. Hy het sedert 1985 gereeld as gasspreker opgetree by baie groot maatskappye se funksies. Hy het reeds twee keer by die MultiRand Forum, 'n prestige geleentheid in die versekeringsbedryf, en by die SA Sakevrou van die jaar opgetree.
Behalwe 'n suksesvolle loopbaan in kleinhandel, mannekragbestuur, rekenaarprogrammering en kliëntediens het Ferreira baie vermag in sy persoonlike lewe. "Die feit dat hy nie kan sien nie het hom nie teruggehou nie en hy meen sy humoristiese uitkyk op die lewe help hom baie. In sy lewe het hy reeds die Comrades-, New York City- en vele ander maratons voltooi. Hy het Kilimanjaro uitgeklim asook tot by die Mount Ama Dablam-basiskamp in die Himalajas."
Sy vrou, Ina, en twee kinders asook vir kleinkinders motiveer hom om 'n normale en gelukkige lewe te lei. Ferreira se redes vir die boek is, “Ek hou daarvan om mense te laat lag en my kinders het gesê ek moet my stories neerskryf sodat dit behoue kan bly.”