Kiesers verdien antwoorde oor Thembalethu-pad

Kieser, George:

Die hoofpad in Thembalethu, Nelson Mandela Boulevard, was die afgelope twee weke in die nuus. Eers het burgemeester Naik aangekondig dat die munisipaliteit afskeid geneem het van die kontrakteur en daarna het George Herald vir ons gewys hoe die onklaar pad lyk.

Die hele padbou-gedoente laat mense wonder oor ‘n hele klompie vrae.

Kieser se vrae is deur die direkteur van siviel, Regenald Wesso, beantwoord.

Vraag 1: Is dit korrek dat die kontrakteur nog nie tevore ‘n pad gebou het nie?

A: Nee dit is nie korrek nie.

Vraag 2: Hoe is dit dat George-munisipaliteit so ‘n kontrakteur uit Mpumalanga kan aanstel, terwyl die Suid-Kaap bekwame en bewese siviele ingenieursfirmas het wat hier teenwoordig is?

A: Wetgewing laat nie toe dat sekere tenderaars uitgesluit mag word gebaseer op hulle gebied van afkoms nie. Daar was wel ‘n voorafbepaalde voorwaarde, soos toegelaat in die Voorkeurregulasies, dat slegs tenderaars met ‘n vlak 1 BBBEE status tenders kon indien.

Vraag 3: Presies wat was die proses wat gevolg is om tenders te ontleed en te oorweeg?

A: Daar is ‘n Voorsieningskanaalbeleid wat die volle werwingsproses neerlê. Dit is ‘n Raadsbeleid, gebaseer op nasionale wetgewing, wat deur amptenare toegepas word.

Vraag 4: Wie se aanbeveling aan die tenderkomitee was dit om die bepaalde maatskappy aan te stel? Is die aanstelling deur die tenderkomitee gedoen? Of deur wie?

A: Alle tenders word nagegaan vir voldoening aan die tendervereistes waarna dit na die Bodtoekenningskomitee verwys word met ‘n aanbeveling. Die BTK maak ‘n aanbeveling, wat dan slegs deur die Munisipale Bestuurder bekragtig kan word.

Vraag 5: Was die tenderkontrak vir ‘n dubbelpad?

A: Ja dit was vir ‘n dubbelpad. Die projek moes egter aangepas word gegewe die getal oorskrydings binne die padreserwe.

Vraag 6: Hoe gebeur dit dat, ná ‘n jaar, die kontrakvereiste verander word tot enkelpad? Is die tenderbedrag dienooreenkomstig verminder?

A: Die tenderbedrag word gemeet volgens ‘n hoeveelheidslys en ‘n kontrakteur word volgens die gemete hoeveelheid werk betaal.

Vraag 7: Wat was die kontrakbedrag en wat is die maatskappy betaal?

A: Die kontrak is nie voltooi nie, en die finale kontrakbedrag sal eers bepaal kan word nadat die kontraktuele prosesse gefinaliseer is.

Vraag 8: Is daar enige strafbepalings toegepas vir nie-nakoming van tendervoorwaardes? Is die maatskappy beboet omdat die werkfases telkens nie tydig voltooi is nie?

A: Die kontrak is beëindig en die nodige prosesse word gevolg in terme van die kontrakvoorwaardes

Vraag 9: Wat nou? Wie moet die brouwerk klaarmaak, en op wie se koste?

A: Voltooiing van die werke sal deur ‘n ander kontrakteur gedoen word. Kostes sal geëis word teen die verantwoordelike party.

Vraag 10: Wanneer gaan die beloofde dubbelpad wat GO GEORGE-busse kan akkommodeer, dan gebou word?

A: Dit sal eers in die toekoms kan plaasvind wanneer fondse weer beskikbaar word. Aangesien die DA hom roem op deursigtigheid en goeie regering, sal burgemeester Naik sekerlik die geleentheid verwelkom om so gou doenlik en in besonderhede op hierdie kwelvrae te antwoord. Mense van George en veral Thembalethu wag daarop.