Biblioteke loop deur onder vandale
George-biblioteke het ‘n pleidooi aan vandale gerig om op te hou om biblioteekgeboue te bevuil en te beskadig. Hulle vra ook die gemeenskap om vandalisme en oortreders aan te meld by Wetstoepassing by 044 801 6350 or 044 801 6300.
Debra Sauer, ‘n kommunikasiebeampte van die George-munisipaliteit, vra dat almal om sien na dié kosbare geboue waar jonk en oud toegang het tot hulpmiddele vir opvoeding asook kommunikasie.
Rachel Williams, bestuurder van George-biblioteke, sê die biblioteke gaan gebuk onder graffiti, urinering teen mure, gebreekte vensters, gebruikte inspuitnaalde, verwydering van toiletpapier en toiletsitplekke, gebreekte toiletpapierhouers, daggarokery, verwydering van plaveisel, steel van ligte uit toilette, asook die diefstal van brandblussers en handvatsels.
Sy sê die drag van sake maak personeel sowel as biblioteekgebruikers ongelukkig.
Sy sê biblioteke is vergaderplekke waar elke lid van die gemeenskap die reg het om ongestoord in ‘n veilige omgewing te verkeer. “Biblioteke getuig van orde en netheid in ‘n gemeenskap.”
Sy sê die munisipaliteit doen alles in sy vermoë om sekuriteit by die geboue te handhaaf.
“’n Beroep word dus op alle lede van die publiek gedoen om te verseker dat almal hul reg van toegang tot inligting in ‘n aangename, rustige en skoon fasiliteit kan geniet,” sê Williams.