Nic Zerbst op ererol vir filatelie
Plaaslike seëlversamelaar dr. Nic Zerbst het op Dinsdagaand 12 Februarie sy handtekening op die Ererol van Uitgelese Filateliste van die Filateliese Federasie van Suid-Afrika verewig.
Hierdie eer word slegs toegestaan aan filateliste wat ongewone hoogtes in hul stokperdjie bereik. Joh
Groenewald, seremoniemeester by die toekennings geleentheid wat by die George gholfklub gehou is, het gesê dit gebeur nooit dat meer as een of twee name per jaar by die ererol gevoeg word nie. Soms is daar glad nie een nie. Of 'n versamelaar die ererol haal, hang af van die uitslag van 'n geheime stemming van 'n paneel by die jaarlikse nasionale seëlkongres in Pretoria. Hulle neem hulle besluit op grond van 'n sitaat wat oor die bepaalde lid gelewer word.
Zerbst het al 'n lang lys toekennings vir sy versamelings ontvang. Dit is veral sy versamelings wat met die Anglo Boereoorlog verband hou wat uitsonderlik is. Vyf daarvan is in die afgelope 33 jaar by Suid-Afrikaanse nasionale uitstallings met van die hoogste toekennings bekroon. Sy versameling van die Kampe vir Boerekrygsgevangenes in Indië word as 'n wêreldbeste beskou.
Dit bevat merkwaardige posstukke van al 14 kampe in Indië waarvan 'n klomp skaars sensormerke op het. Volgens Zerbst was een van sy oupas 'n krygsgevangene tydens die Anglo-Boereoorlog. "Hy en my ouma, wat in 'n konsentrasiekamp op Volksrust was, het geweldig baie briewe vir mekaar geskryf. Hulle het ook ongelooflik wyd met mense oor die wêreld gekorrespondeer in die tyd toe hulle daar was. Daardie korrespondensie is 'n versameling op sy eie. Ek het dit alles by my oupa geërf."
Sy oupa was 'n Russiese manskap en ouma 'n Nederlandse verpleegster en albei was vrywilligers by die Boeremagte.
Zerbst se liefde vir filatelie het op 10-jarige ouderdom posgevat danksy hierdie oupa van hom en hy het oor die afgelope 60 jaar 'n merkwaardige versameling opgebou. Sy versameling van sensormerke van die Boeremagte is ongeëwenaard. Hy besit verder twee besonderse versamelings oor die pos van Boere-krygsgevangenes op St Helena en in Ceylon.
Zerbst is al meer as 30 jaar lid van die Anglo-Boereoorlog Filatelievereniging, die George-seëlklub (voorsitter vir die afgelope twee jaar) en van die Oranje Vrystaatse Filatelievereniging.