Eienaar ‘kan niks doen’ om te beveilig
Toekomstige planne van die Georgemunisipaliteit weerhou blykbaar die eienaar van die Prince Vincent Square in CJ Langenhovenstraat, om enige veranderings te maak.
Die eienaar Garth Varty, sê hy moes destyds 'n verkeerstudie doen om te bepaal hoe die verkeersvloei dalk in die toekoms gaan wees. "Ek het uitgevind dat die stoepe van my gebou deel van die sypaadjie is en dus oopgelos of onveranderd gelaat moet word vir moontlike toekomstige opgradering van die pad."
Hy sê hy is ingelig dat die paadjie dalk deel van 'n derde baan kan word.
George Herald het voorheen berig oor haweloses wat die stoepe van die gebou as slaapplek en toilet gebruik. In die eerste berig het die munisipaliteit in hul kommentaar gesê: "Die eienaar is verantwoordelik vir die veiligheid van sy eiendom."
Maar Varty meen hoewel hy die gebou besit, dit steeds op munisipale grond is en dit beteken hy kan niks doen nie.
Die munisipale bustuurder, Trevor
Botha het voorheen gesê: "Eienaars is verantwoordelik vir veiligheid in en rondom hul geboue en kan dit doen deur 'n sekerheidswag daar te sit of deur veiligheidshekke."
Varty sê hy het wel 'n sekerheidswag aan die binnekant van die eiendom asook veiligheidsmaatreëls wat sy eiendom veilig hou.
"Ek het sover ek toegelaat is, dinge gedoen om die sypaadjie of stoepe skoon te hou. Ek het selfs 'n sprinkelstelsel laat insit sodat die huurders die stoepe daarmee kan afspoel.” Hy sê dit is verskriklik hoe dit daar lyk met al die reuke en vlekke op die sement wat deur die urinering gelaat is.
Hy het ook aan George Herald vertel dat tydens 'n ontmoeting met Botha sowat 'n jaar gelede, is al die probleme bespreek en was wetstoepassing ook daar.
Die huurders sê hulle is moeg daarvan om soggens eers skoon te maak voor hulle by hul deure kan instap. In die vorige berig kla die huurders oor rommel, ou klere en menslike afval wat op hul stoepe gelos word. Een huurder sê dit help nie jy bel munisipale wetstoepassers nie, dan word jy na die polisie verwys.
Kapt. Malcolm Pojie, die SuidKaapse polisiewoordvoerder, was self by die huurders en het aan hulle verduidelik dat dit wetstoepassing se plig is om op te tree op munisipale grond en die polisie sal hulle ondersteun as dit gewelddadig raak of iemand voel sy lewe is in gevaar.
Botha sê in 'n nuwe persverklaring dat die antigrondbesettingseenheid met die eienaar kontak sal maak. Hy voeg by dat die gebou en area ter sprake tegnies gesproke eintlik privaat eiendom is. "Wanneer 'n gebou se dak oorhang dan behoort daardie gedeelte steeds aan die eienaar. Maar die munisipaliteit erken dat die stoep ook dien as 'n sypaadjie."
Botha sê hy hoop daar kan 'n oplossing gevind word. Hy sê waar munisipale wette oortree word, moet daar 'n klag by wetstoepassing teen die oortreder gelê word, 'n boete sal uitgereik word en die klaer moet bereid wees om in hof te getuig.
Wetstoepassing: 044 801 6350 (07:45 tot 16:30)
Anti-grondbesettingseenheid: 044 801 9101 (07:45 tot 16:30)
Na-ure (alle departemente): 044 801 6300