Rommel, bouery en gapende gate
‘n Bejaarde vrou van
Rosemoor word deesdae deur ‘n rotplaag gepes weens onwettige rommelstorting reg langs haar huis.
Dié inwoner van Beerstraat weet nie meer hoe om te maak met die gemors wat haar daagliks in die gesig staar nie. Volgens die inwoner raak die oortreders dreigend wanneer hulle oor hul dade gekonfronteer word. Die rommelhoop is weens ‘n tekort aan ekstra hulpbronne vir ‘n wyle nie deur die munisipaliteit skoongemaak nie. Die hoop het buite perke gegroei en allerlei pestilensies het daar begin broei.
George-munisipaliteit het onlangs begin om weer hieraan aandag te gee. “Dit is ‘n bekende ‘hot spot’ en skoonmaaktrokke ry gewoonlik daar om wanneer hulle klaar is met ander rondtes,” het mediaskakelbeampte, Athane Scholtz, gesê.
“Daar was onlangs nie ekstra hulpbronne om daarby uit te kom nie, maar behoort binnekort weer deel te vorm van ‘n gereelde rondte om onwettige stortings daar skoon te maak.”
Intussen kan inwoners 044 802 2900 skakel om onwettige stortings aan te meld, waarop die munisipaliteit so gou moontlik sal reageer.
Watermeter en grenslyne
‘n Inwoner van Tiptolstraat in Conville sukkel al ‘n geruime tyd met haar watermeter wat glo deur die bure tydens bouwerk stukkend gesteek is. Die bure het glo boonop teen die grens gebou, teen haar kragboks se punte aan die buitekant van haar huis, teen alle bouregulasies. Die pyp is wel intussen reggemaak en geskuif, maar nou is die pyp aan die buitekant van haar erf en sy is bang dat kinders die pyp kan beskadig.
Scholtz het by navraag gesê die waterpyp en die meter het vroeër deur die verkeerde erf geloop. Dit is nou in die korrekte posisie en loop in die regte erf in. “Die watermeter kan maklik gelees en gediens word en is die verantwoordelikheid van die munisipaliteit. Ons hoop dat dit (die pyp en meter) nie deur kinders beskadig sal word nie, maar dit is nie die huiseienaar se verantwoordelikheid indien dit wel sou gebeur nie.”
“‘n Kennisgewing is op die oortredende eienaar beteken vir die oprigting van ‘n struktuur sonder die nodige goedkeuring. Die struktuur is onwettig binne die straatboulyn opgerig. Die eienaar het versuim om aan die eerste kennisgewing te voldoen. Genoemde kennisgewing het op 15 Februarie verstryk. ‘n Finale kennisgewing is Maandag 18 Februarie beteken waarna dit na die regsafdeling verwys sal word.”
Intussen kan inwoners 044 802 2900 skakel om onwettige stortings aan te meld, waarop die munisipaliteit so gou moontlik sal reageer.
‘n Inwoner van Hebronlaan in George-Suid kla dat ‘n gat van twee meter breed deur die munisipaliteit gemaak is toe hulle sy waterpyp moes herstel. Die gat is vir weke oopgelos, en die plaveisel is ook daarmee heen.
Volgens Scholtz is dit die munisipaliteit se eerste prioriteit om die pypbars te herstel en daarna die uitgrawing te beveilig. “Dit beteken genoeg grond word ingegooi sodat mense daaroor kan ry of loop, maar dit is nie die finale opvulling nie,” het sy gesê. ‘n Kontrakteur word aangestel om die opvulen plaveiwerk te doen. “Die kontrakteur moet eers ‘n kwotasie gee wat goedgekeur moet word en hierna kry die kontrakteur die opdrag om voort te gaan. Daar is gewoonlik ‘n hele lys van plekke op ‘n slag wat ingevul en herstel moet word.
“Die kontrakteur moet ook soms wag vir spesifieke boumateriaal. Van die regmaak van die pyp tot die herstel van die oppervlak kan sowat drie weke neem, maar dit neem soms korter. In hierdie geval is die adres reeds vir die kontrakteur deurgegee.”