Naweek van messteek en moord
Vyf mense is verlede naweek in George vermoor. Vier van dié slagoffers is met messe doodgesteek.
In Blanco is 'n man, Johannes Stuurman (38) in Crystal-rylaan in Golden Valley, in die nek gesteek. Sy hoofslagaar is getref en hy het op die toneel gesterf. Kort daarna is Neil Moos in hegtenis geneem. 'n Bebloede mes is in sy besit gevind.
Volgens George-polisie se kommunikasiebeampte, kapt. Nolonwabu Tshengu, het daar glo 'n stryery tussen die twee mans ontstaan waarna Moos na bewering vir Stuurman doodgesteek het.
Die George Herald het vertroulik verneem dat dwelms moontlik die oorsaak van die bakleiery was. Stuurman, met 'n rits vorige veroordelings, waaronder poging tot verkragting en ernstige aanranding, is in 2017 ook van verkragting aangekla.
Moos het Dinsdagoggend, 5 Maart in die George-landdroshof verskyn. Sy volgende verskyning is 18 Maart vir 'n formele borgtogaansoek.
Pacaltsdorp
'n 47-jarige man van New Dawn Park, Jack Claassen, het Dinsdag in verband met sy vrou se moord in die George-landdroshof verskyn. Hy verskyn vandag, Donderdag 7 Maart weer in die hof.
Volgens die polisie het die moord omstreeks 21:00 op Saterdag 2 Maart by die paartjie se huis in Sierriestraat plaasgevind.
Kapt. Malcolm Pojie, die Suid-Kaapse polisiewoordvoerder, het gesê die voorlopige ondersoek toon dat die verdagte en sy vrou (43) in hul tuin gesit het toe hulle begin baklei het.
"Volgens getuies het die verdagte sy vrou met 'n beton-latei teen die kop geslaan.
Sy het 'n oop wond aan die linkerkant van haar kop gehad. Die slag het glo haar onmiddellike dood veroorsaak. Paramedici was vinnig op die toneel. Hulle het haar dood verklaar," het Pojie gesê.
Herold
'n Man (35) is Sondag 3 Maart na bewering deur sy lewensmaat (45) in Herold doodgesteek. Volgens kapt. Tshengu, het die verdagte en die oorledene geargumenteer waarna die oorledene doodgesteek is.
"Die verdagte was na bewering besig om aartappels met 'n mes te skil toe die bakleiery ontstaan het en sy die oorledene in die maag gesteek het," het Tshengu gesê.
Die verdagte is in hegtenis geneem en het Dinsdag 5 Maart in die George-landdroshof verskyn. Teen druktyd kon die besonderhede rondom die hofverskyning nie bevestig word nie.
Twee moorde in Thembalethu
Twee mans is Sondag 3 Maart in twee afsonderlike messteekvoorvalle in Thembalethu dood. In die eerste voorval is 'n 21-jarige man naby Shop 1-taverne in Ramaphosa na bewering deur 'n verdagte (23) doodgesteek. Volgens luitenant-kolonel Eric Julies, het daar omstreeks 02:00 'n bakleiery tussen die twee mans ontstaan waarna die verdagte die oorledene, wat op die toneel gesterf het, met 'n mes gesteek het.
Daar word beweer dat 'n liefdesdriehoek die moontlike oorsaak kon wees. Die verdagte sou na verwagting Woensdag in die George-landdroshof verskyn.
Nie ver van dié toneel is 'n 31-jarige man in Tabatastraat na bewering deur twee 18-jarige seuns doodgesteek. Die oorsaak van die voorval word nog ondersoek. Die twee verdagtes was geskeduleer om Woensdag in die George-landdroshof te verskyn.
Julies het hierdie voorvalle toegeskryf aan alkoholmisbruik in die omgewing.
Teen druktyd was die besonderhede rondom die twee hofverskynings nog nie beskikbaar nie.