KKNK: ‘n Kwarteeu se feeskunstenaars stal uit
Die hoogtepunt op die KKNK se visuele kunsprogram vanjaar is die KKNK25-terugblikuitstalling met werke van die vorige 24 jaar se feeskunstenaars wat ten toon gestel word.
Volgens Lucia Boer, kunskurator van die KKNK, is dié uitstalling ’n viering van al die feeskunstenaars oor die afgelope 24 jaar en hul bydrae tot die visuele kunste by die fees. Werke van Jan Vermeieren, Hardy Botha, Erik Laubscher, Willie Bester, Wendy Malan, Piet Grobler, Claudette Schreuders, Wim Botha, Lien Botha,
Minnette Vári, André Naudé,
Judy Woodborne, Lawrence Lemaoana, Hylton Nel, Lukas Thobejane, Michaella Janse van Vuuren, Helena Hugo, Handspring Puppet Company, Diane Victor, Gordon Froud, Louis Jansen van Vuuren, Willem Boshoff,
Berni Searle, Hanneke Benadé, Kagiso Pat Mautloa en Johannes Maswanganyi is hier te sien.
Absa, hoofborg van die
KKNK, is ook betrokke by twee uitstallings. “Met Maakit Mooi word vyf splinternuwe, funksionele kunswerke geïnstalleer om Oudtshoorn te verfraai, na die eerste vier wat verlede jaar in die dorp opgerig is. Absa bied ook ’n uitstalling in die Prince Vintcentgebou aan, getiteld Imagining Tomorrow,” vertel Boer.
Absa stel ook tydens die fees die Laat Jou Kuns Wenmentorskapprogram bekend. Die doel hiervan is om geleenthede vir die ontwikkeling van individue in verskeie kunsvorme te skep.
Drie opkomende kunstenaars van Oudtshoorn en Toekomsrus, Colin Meyer, Earlyn Cloud, en Zietske Saaiman, skop die program af.
Dié visuele kunsuitstallings kan daagliks van 09:00 tot 17:00 in die Prince Vintcent-gebou gesien word. Toegang tot die uitstallings is gratis. Boer tree daagliks om 11:00 hier in gesprek met visuele kunstenaars wat by die fees uitstal. Elke gesprek fokus op ’n ander kunstenaar en die temas van hul werk word bespreek. Boer neem feesgangers ook op ’n toer deur die uitgebreide uitstallings op 22 Maart om 15:00, 23 Maart om 15:00 en 24 Maart om 15:00. Gesprekke en rondleidings word gratis aangebied.
Dr. Paul Bayliss en Absa se mede-kunskurator, Thabo
Seshoka, bied daagliks om 08:30 begeleide kunstoere aan wat hul Maakit Mooi-installasiepersele regoor Oudtshoorn besoek en vir feesgangers buitengewone insigte in die kreatiewe prosesse agter die ontwikkeling en skepping van die kunswerke, gee.
Die volledige feesprogram is by www.kknk.co.za beskikbaar en kaartjies vir produksies is by Computicket, Shoprite/Checkers en House & Home beskikbaar.